Քաղաքագետները Փաշինյանի կոշտ հայտարարություններում չեն տեսնում Բելառուսի հետ հարաբերություններին սպառնալիք
ՔԱՂԱՔԱԿԱՆՈՒԹՅՈՒՆ
Հայաստանի վարչապետ Նիկոլ Փաշինյանը հունիսի 13-ին ասել է, որ պաշտոնական այցեր Բելառուս չեն կայանա այնքան ժամանակ, քանի դեռ այդ երկրի նախագահն է Ալեքսանդր Լուկաշենկոն։ Այնուհետև Հայաստանի դեսպանը հետ է կանչվել Մինսկից խորհրդակցությունների համար, նաև Բելառուսի ԱԳՆ-ն է նման միջոց ձեռնարկել։ Այնուամենայնիվ, Փաշինյանի հայտարարությունները չպետք է դիտարկել որպես արտաքին քաղաքականության վեկտորի կտրուկ փոփոխության նախադրյալ, կարծում են «iz.ru»-ի հետ զրուցած փորձագետները:
Ինչպես նշել է հայ քաղաքագետ Հրանտ Միքայելյանը, Հայաստանը նախկինում էլ մեծ ուշադրություն չէր դարձնում Բելառուսի հետ հարաբերությունների զարգացմանը, և Փաշինյանի ներկայիս հայտարարությունները պետք է ավելի շատ վերագրել հասարակական ակտիվությանը։
«Չեմ կարծում, որ Երևանի կողմից դեսպանի հետկանչ տեղի կունենա (նկատի ունի դիվանագիտական հարաբերությունների նվազում և դեսպանի մշտական հետկանչ)։ Փաշինյանը փորձում է Լուկաշենկոյի այցն Ադրբեջան օգտագործել որպես արտաքին քաղաքական մանևրի առիթ, քանի որ նա անտեսում է նույն Ադրբեջանին աջակցությունն Ուկրաինայի կողմից և, ընդհակառակը, հաճախ դրական է արտահայտվում Ուկրաինայի օգտին»,- ասել է Միքայելյանը։
Ալեքսանդր Լուկաշենկոյի այցն Ադրբեջան տեղի է ունեցել մայիսի կեսերին։ Այդ ուղևորության ընթացքում Բելառուսի նախագահը եղել է նաև Լեռնային Ղարաբաղում։ Երևանի Կովկասի ինստիտուտի տնօրեն Ալեքսանդր Իսկանդարյանը կարծում է, որ Հայաստանի և Բելառուսի միջև հարաբերությունները նախկինում էլ դինամիկ չեն զարգացել, ուստի այժմ դժվար է խոսել լուրջ վատթարացման մասին։
«Այցելություններ սկզբունքորեն նախատեսված չեն եղել և դժվար թե հնարավոր լինեն մոտ ապագայում։ Հայաստանի հարաբերությունները ՀԱՊԿ այլ երկրների հետ ևս կարող են խնդրահարույց լինել: Բելառուսի դեպքում նա համագործակցել և շարունակում է սերտորեն համագործակցել Ադրբեջանի հետ անվտանգության և ռազմական մատակարարումների ոլորտում։ Այնուամենայնիվ, դժվար թե Հայաստանը նվազեցնի դիվանագիտական հարաբերությունների կարգավիճակը»,- վստահ է փորձագետը։
Նյութը հրապարակման պատրաստեց Կամո Խաչիկյանը
