Շուռնուխում ապրելու մասին 4 տարի է մոռացել են
ՀԱՍԱՐԱԿՈՒԹՅՈՒՆ
Հիմա, երբ ամբողջ լրահոսը Տավուշի սահմանազատման ու սահմանագծման գործընթացի մասին է, Սյունիքի մարզի՝ ադրբեջանցիների հետ «կիսված» Շուռնուխ գյուղում զարմանում են, որ իրենցով հետաքրքրվողներ կան։
Վարչական ղեկավարը MediaHub-ի հետ կիսվեց իր մտագոհություններով․ Շուռնուխում կյանքը կանգ է առել, մարդիկ ընդամենը գոյատևում են, լիարժեք ապրելու մասին, արդեն 4 տարի է, մոռացել են։
«Այն բնակիչները, որոնց տներն անցել են Ադրբեջանին, գնացին ու հետ չեկան։ Նրանց մի մասը վարձակալական հիմունքներով ապրում է Կապանում, Գորիսում ու տարբեր բնակավայրերում։ Համայնքը 13 տուն է կառուցել, արդեն ամեն ինչ պատրաստ է, բայց վերադարձող դեռ չի եղել։ Նույնիսկ Արցախից տեղահանված ընտանիքներին ենք առաջարկել, եկել ու տեսել են, որ ադրբեջանցիները շատ մոտ են, չեն մնացել, որովհետև իրենց պատճառով են տուն-տեղ կորցրել։ Անվտանգության երաշխիք չկա, չգիտեմ, անորոշություն է»,- ասաց Գրիգոր Դարբինյանը։
Նախքան 2020 թվականի դեպքերը Շուռնուխի բնակիչները զբաղվում էին հողագործությամբ և անասնապահությամբ։ Դարբինյանն ասում է, որ բոլորը խոշոր ու մանր եղջերավոր անասուններ ունեին։ Ցավոք վաճառեցին, քանի որ արոտավայրերն անցել են Ադրբեջանի վերահսկողության տակ։
«Հիմա ո՛չ անասնապահությամբ ենք զբաղվում, ո՛չ հողագործությամբ։ Մարդիկ բոլորն իրենց տներում են, անգործություն է»։
Շուռնուխում այժմ 28 ընտանիք է ապրում, մանկապարտեզ է հաճախում 7, իսկ դպրոց՝ 16 երեխա։ Մինչ ադրբեջանցիների հայտնվելը, այդ թիվը հասնում էր 40-ի։ Նրանք, ովքեր հարկադրաբար հեռացան գյուղից, կվերադառնան արդյո՞ք։
«Եթե անգամ չգան, ոչ ոք չի կարող մեղադրել նրանց, որովհետև ամենուր ադրբեջանցիների ներկայությունն է։ Իհարկե՛, չէինք ցանկանա, որ այստեղ լինեն, բայց ի՞նչ կարող ենք անել, գնալու այլ տեղ չունենք։ Մի քանի անգամ անասուններն անցել են մյուս կողմ, ռուսների միջոցով վերադարձրել ենք, հիմա նրանք էլ են հեռացել մեր տարածքից։ Մեր հույսը մենք ենք ու սահմանապահները։ Չգիտենք՝ վաղն ինչ կլինի»,- հավելեց Դարբինյանը։
Նա նաև անդրադարձավ ԱԺ նախագահի այսօրվա հայտարարությանը, թե «ՔՊ-ն Կիրանցում շռնդալից հաղթանակ է տանելու ընտրությունների ժամանակ»։ Շուռնուխի վարչական ղեկավարը չբացառեց, որ Սիմոնյանը հավանաբար նկատի է առել իրենց գյուղի օրինակը, որովհետև 2021 թվականի ընտրություններից առաջ եկել են խաղաղության կեղծ օրակարգով ու կեղծ խոստումներով։ Սակայն դրանից հետո՝ 2022-ին, Սյունիքում պատերազմ էր, որի արդյունքում ՀՀ սուվերեն տարածք մխրճված ադրբեջանցիներն առ այս պահը դուրս չեն եկել։
«Շուռնուխցիներն այլևս ոչ ոքի չեն հավատում։ Ժողովրդի մասին մտածող չկա։ 2020-ից հետո ամեն ինչ փոխվեց և իմաստազրկվեց: Ինչ վերաբերում է անվտանգությանը, խոսք չկա, քանի ադրբեջանական դրոշը և ադրբեջանցիները երևում են մեր տներից»,- հավելեց նա։
Հունան Թադևոսյան
