Նոր զիջումների ուղիղ ակնարկ կառավարության նիստի ժամանակ
ՔԱՂԱՔԱԿԱՆՈՒԹՅՈՒՆ
«Մենք որդեգրել ենք սկզբունք, որ սահմանն անցնում է այնտեղով, որտեղով անցնում է»:
Այս մասին այսօր՝ մայիսի 16-ին, կառավարության նիստում հայտարարեց ՀՀ վարչապետ Նիկոլ Փաշինյանը:
«Սա շատ կարևոր սկզբունք է, որովհետև եթե մենք գնայինք այն տրամաբանությամբ, որ այս սկզբունքից շեղվելով պետք է նոր սահմանագիծ ստեղծենք, դա կնշանակեր, որ ստեղծում ենք էսկալացիայի և ռազմական բախումների հարատև աղբյուր: Այս մեր սկզբունքի ամրագրմամբ, որ ասում ենք՝ սահմանն անցնում է այնտեղով, որտեղով անցնում է, մենք, ըստ էության, էսկալացիոն կոնտեքստը, եթե դուրս չենք բերել, առնվազն, էականորեն նվազեցրել ենք»,-ասաց նա:
Սա հայտարարում է մի երկրի ղեկավար, ով այս արտահայտությունից րոպեներ առաջ ասում էր, որ սահմանազատում և սահմանագծում է տեղի ունենում սովետական ամենավերջին քարտեզի հիման վրա։ Օրեր առաջ էլ գործընթացը տեղի էր ունենում Ալմա-Աթայի հռչակագրի հիման վրա։ Ըստ ադրբեջանի նախագահի՝ այն տեղի է ունենում Ադրբեջանի կողմից պատրաստված փաստաթղթերի հիման վրա։
1or.am-ը քաղաքագետ Երվանդ Բոզոյանից հետաքրքրվեց, թե ինչպե՞ս պետք է հասկանալ վարչապետի այս իրար էականորեն հակասող արտահայտությունները։ «Խորհուրդ եմ տալիս վարչապետին հասկանալու փորձ չանել։ Ինքը տարբեր ժամանակներում, տարբեր հայտարարություններով է հանդես գալիս, որը ոչ մի կապ չունի իրականության հետ։
Եթե հարցը վերաբերում է դեմարկացիային և դելիմիտացիային, ապա պետք է լուծումը լինի փաթեթային, և սա Փաշինյանը խոստովանեց դեռ փետրվարի 19-ի կառավարության նիստում՝ հայտարարելով, որ բացի փաթեթայինից այլ լուծում չկա։
Գտնում եմ, որ դա ճիշտ էր։ Սա նշանակում էր, որ մինչև դեմարկացիա անելը, պետք էր դելիմիտացնել ամբողջ տարածքը, ճանաչել միմյանց տարածքային ամբողջականությունը։
Ադրբեջանը չի ճանաչում ՀՀ տարածքային ամբողջականությունը և գործընթացը տանում է ուժի սպառնալիքով ու չի թաքցնում դա։ Իրեն քննարկելը անիմաստ է։ Իրեն պետք է վերլուծել օրվա կուրսով և հասկանալ, թե ինչո՞ւ է այդպիսի բան հայտարարում այսօր»,- նշեց քաղաքագետը։
Այսօրվա սկզբունքով վերլուծելիս՝ ինչո՞ւ ասաց սկզբունք ունեն, որ սահմանն անցնում է այնտեղով, որտեղով անցնում է։ Արդյո՞ք դա նշանակում է, որ Ադրբեջանը դուրս չի գալու օկուպացված տարածքներից։
«Այսօրվա դրությամբ էլ փորձում է ինչ-որ բաներ ասել, բայց հեռահար նպատակներն անհասկանալի են։ Բանակցություններն ամբողջությամբ տապալված են և այս իրավիճակում իրավասու չէ բանակցել այլևս ոչ մի բան։ Քննարկել թե այս կամ այն բանն ինչու է ասում, անիմաստ եմ համարում։ Վաղն էլ այլ բան կարող է հայտարարել»,- 1or.am-ի հետ զրույցում նշեց Բոզոյանը։
