Հակաքարոզչությամբ իշխանությունն իրեն է վնասում, լավ է անում, թող շարունակի․ Մելիք-Շահնազարյան

Հանրապետության հրապարակում երեկ «Տավուշը հանուն հայրենիքի» շարժումը հստակեցրեց պահանջը՝ Նիկոլ Փաշինյանին ժամանակ տալով հրաժարական ներկայացնել։ Քաղաքագետ Հրանտ Մելիք-Շահնազարյանի խոսքով՝ պահանջ չի փոխվել։ 

«Շարժման անդամները ժամանակ էին տվել դադարեցնել ապօրինի սահմանազատման գործընթացը և ակնհայտ էր, որ եթե իրենց պահանջներին պատասխան չհնչի, լինելու էր հրաժարականի պահանջ։ Սա սպասված և տրամաբանական պահանջ էր։ Հիմա գործընթացն ավելի քաղաքական բնույթ ստացավ, տեղափոխվում է խորհրդարան։ Իմպիչմենտի ճանապարհով են փորձելու հասնել այս իշխանության հեռացմանը։ Կարծում եմ, տրամաբանական է, այլ կերպ չէր էլ կարող լինել։ Պարզ էր, որ Նիկոլը հրաժարական չէր տալու»,- 1or.am-ի հետ զրույցում ասաց քաղաքագետը։ 

Նա տեսնում է հաջողության հասնելու բոլոր հիմքերը և հուսով է, որ այդ հիմքերի վրա ճիշտ պատկեր կկառուցեն և գործընթացը կհասնի իր տրամաբանական ավարտին։ Անդրադառնալով տարբեր մանիպուլատիվ թեզերին, որ տարածվում են իշխանական քարոզչամեքենայի կողմից, Հրանտ Մելիք-Շահնազարյանն ասաց․ «Կարծում եմ իշխանական թեզերը վաղուց արդեն չեն աշխատում, Սրբազանի պարագայում՝ առավել ևս։ Մարդիկ հասկանում են, որ Սրբազանի կերպարը, այն կերպարը չէ, որից մշտապես փորձել են խուսափել հանրային լայն զանգվածները։ Այդ հակաքարոզչությունն էլ, իմ կարծիքով, ի օգուտ Սրբազանի է, աշխատում է նրա օգտին։ Մենք երեկ տեսանք, թե ինչ վերաբերմունք ունեին քաղաքացիները Սրբազանի նկատմամբ։ Կարծում եմ, հակաքարոզչությամբ իշխանությունն իրեն է վնասում, լավ է անում, թող շարունակի»,- եզրափակեց Հրանտ Մելիք-Շահնազարյանը։