Պաշտպանը Միկա Բադալյանի անմեղությունն ապացուցող փաստեր է մատնանշում

Մայիսի 5-ին լրագրող Ժիրայր Ոսկանյանը հաղորդում էր ներկայացրել, թե Միքայել Բադալյանը Երևանի ռեստորաններից մեկում իր նկատմամբ բռնություն է գործադրել։ Դեպքի առթիվ ՀՀ քննչական կոմիտեում քրեական վարույթ է նախաձեռնվել։
Ըստ ՔԿ հաղորդագրության՝ «2024թ․ մայիսի 5-ին ոստիկանություն հաղորդում է ստացվել այն մասին, որ նույն օրը երեկոյան, Երևան քաղաքի Թումանյան փողոցում գործող ակումբներից մեկում, Մ․Բ․-ն և նրա սեղանակիցները վիճաբանել են լրագրող Ժիրայր Ոսկանյանի հետ, ձեռքերով անհարգալից ժեստ ցույց տվել, վերցրել հեռախոսը, որը որոշ ժամանակ անց վերադարձրել են, ինչպես նաև քաշքշել են նրան՝ պատճառելով ֆիզիկական ցավ»։

ՀՀ քրեական օրենսգրքի 297-րդ հոդվածի 2-րդ մասի 1-ին կետի (խմբի կազմում խուլիգանությունը) և 460-րդ հոդվածի 1-ին մասի (ինքնիրավչությունը) հատկանիշներով նախաձեռնվել է քրեական վարույթ։ Ժիրայր Ոսկանյանը ճանաչվել է տուժող։ 
Ավելի ուշ Բադալյանի պաշտպանները հանդես եկան հայտարարությամբ․ «Միքայել Բադալյանը Ժիրայր Ոսկանյանի նկատմամբ բռնություն չի գործադրել և դրա վերաբերյալ կան անժխտելի ապացույցներ։ Միքայել Բադալյանը չի խուսափում քննությունից և քննիչի յուրաքանչյուր կանչով պատրաստակամ է ներկայանալ վերջինիս մոտ»։

1or.am-ը Բադալյանի պաշտպան Ալեքսանդր Կոչուբաևից հետաքրքրվեց, թե որոնք են իրենց մատնանշած անժխտելի ապացույցները։

«Այդ պահին ռեստորանում եղել է 30 անձ և միայն Ոսկանյանն է նշում, որ բռնություն է եղել, որ հեռախոսն են խլել և այլն։ Մնացած` 29-ի ցուցմունքը հակառակն է ապացուցում։ Ես և փաստաբան Էրիկ Ալեքսանյանը ևս եղել ենք այդ ռեստորանի մեկ այլ սրահում և որևէ վիճաբանության ձայն չենք լսել։ Չեմ ճանաչում այդ տղային, այս դեպքով եմ միայն իմացել իր մասին, բայց, հավանաբար, ուշադրության պակասի խնդիր կա, որ նման հաղորդում է ներկայացրել։ 29 անձ այլ բան է պնդում և հակառակն ասելն ուղղակի էժան, ուշադրություն հրավիրող քայլ է»,- 1or.am-ին ասաց Կոչուբաևը։

Փորձառու փաստաբանի համար անակնկալ էր այն, որ վարույթի շրջանակներում փակվել է Թումանյան փողոցում գտնվող ռեստորանը։ Կոչուբաևի գնահատմամբ՝ եթե նույնիսկ այդ վիճաբանությունը եղած լիներ, ապա այն ռեստորանը փակելու հիմք չէր կարող լինել։ Վարույթով ռեստորանի վրա որևէ արգելանք չի դրվել։ Պաշտպանները դիմել են  քննչական կոմիտե՝ պատճառը հասկանալու համար ։ 

Նշենք, որ Միքայել Բադալյանն իրեն հասցեագրված մեղադրանքները չի ընդունում։