F-16 Ուկրաինայի համար. փորձագետը մատնանշել է դրանց հնարավոր թիրախները
ՔԱՂԱՔԱԿԱՆՈՒԹՅՈՒՆ
Ավիացիոն փորձագետ Անատոլի Խրապչինսկին որոշ մանրամասներ է ներկայացրել հանրահայտ այս զինատեսակի հնարավոր կիրառման վերաբերյալ,- գրում է unian.net-ը։
Երբ Ուկրաինան ստանա արևմտյան F-16 կործանիչներ, նա կկարողանա զգալիորեն նեղել ռուսական ինքնաթիռներին և հարվածներ հասցնել ռազմավարական կարևոր թիրախների։ Ավելին, Կիևը կարող է ինքնաթիռների հետ մեկտեղ ստանալ դրանց համար նախատեսված հեռահար հրթիռներ, որոնք կարող են հաղթահարել մինչև հազար կիլոմետր հեռավորություն։ Իսկ ի՞նչ նպատակներ է դա հետապնդում Ուկրաինայի Զինված ուժերի համար։
«Եթե մենք խոսում ենք F-16-ի օգտագործման մասին, ապա դրանք կարող են կիրառվել երկու նպատակով․ նախ՝ Ուկրաինայի օդային տարածքը պաշտպանելու, նաև՝ զանգվածային հարվածներ հասցնելու համար: Նշենք, որ ուկրաինական Զինված ուժերը կկարողանա զգալիորեն նեղել հակառակորդի ավիացիային. օրինակ՝ Block 42 կոնֆիգուրացիայով F-16-ը «տեսնում» է 300 կմ հեռավորության վրա: Դա շատ ավելին է, քան կարող են տեսնել ռուսական ինքնաթիռները: Եվ հնարավոր է դրանց ոչնչացնել հեռավորության վրա»,- պարզաբանել է փորձագետը։
Նա նաև ընդգծել է, որ Ռուսաստանի Դաշնության վրա հարձակումների համատեքստում այս ինքնաթիռները ի վիճակի են խոցել խոր թիկունքում տեղակայված ռազմական կարևոր գործարաններ, օդանավակայաններ։
«Եթե Յենս Ստոլտենբերգը (ՆԱՏՕ-ի գլխավոր քարտուղար) հավատարիմ մնա իր խոսքին, որ այդ հրթիռները կարող են օգտագործվել Ռուսաստանի տարածքում ռազմավարական թիրախների դեմ, ապա կարելի է դիտարկել, օրինակ, այնպիսի կարևոր գործարանի ոչնչացումը, ինչպիսին է Ռուսաստանի Դաշնության Մոսկվայի մարզում գտնվող և Х-101, Х-59, Х-69 հրթիռներ արտադրող հաստատությունը, որի արտադրանքը Ռուսաստանը օգտագործում է Ուկրաինայի տարածքում տարբեր թիրախներ խոցելու համար: Կարող ենք որպես թիրախ դիտարկել նաև որոշակի ռազմավարական ավիացիոն օդանավակայաններ, որոնք հասանելի են այդ հրթիռների համար»,- նշել է Խրապչինսկին:
Նա նաև ընդգծել է, որ դժվարություններ չի տեսնում ուկրաինացի օդաչուների կողմից այդ կործանիչները օգտագործելու հարցում, սակայն պետք է հաշվի առնել, որ դրանք արդիական զինատեսակներ են՝ իրենց առավելություններով ու բարդություններով։
«Նոր մոդելներ են, ՆԱՏՕ-ի նոր ստանդարտներ»,- հավելել է փորձագետը:
Նյութը հրապարակման պատրաստեց Կամո Խաչիկյանը
