«Հայաստան». Փաշինյանն իրեն արդարացնելու համար քանդում է մեր պետության հիմքերը
ՔԱՂԱՔԱԿԱՆՈՒԹՅՈՒՆՆիկոլ Փաշինյանն ամբողջովին խեղաթյուրում է 30 տարվա բանակցային գործընթացը և փորձում է արդարանալ։ Այս մասին NEWS.am -ի թղթակցի հետ զրույցում ասել է «Հայաստան» դաշինքի պատգամավոր Աննա Գրիգորյանը։
«Նա հիանալի հասկանում է, թե ինչ արեց Արցախի համար, ինչպես ձախողեց բանակցությունները, ինչպես պարտվեց պատերազմում, ինչպես տապալեց խաղաղ գործընթացը։ Նա Հայաստանի առաջին ղեկավարն է, որն Արցախը ճանաչեց Ադրբեջանի մաս, և դրանով ամեն ինչ ասված է»,- հավելել է պատգամավորը։
Նրա համոզմամբ, Փաշինյանը ազդանշաններ է ուղարկում Ալիևին այն մասին, որ կատարում է նրա բոլոր հրահանգները և ոչինչ չի ասում Արցախի մասին, ընդհակառակը, ասում է, որ Արցախը միշտ եղել է ադրբեջանական։
«Միջազգային հարթակներում արցախահայության էթնիկ զտումների մասին Բաքվի հասցեին արված բոլոր մեղադրանքների ժամանակ բախվում ենք ադրբեջանցիների այն փաստարկին, որ Փաշինյանն Արցախը ճանաչել է Ադրբեջանի մաս։
Հիմա Փաշինյանը ցանկանում է հերթական անգամ ամրագրել իր թեզը, որ Արցախի հարցը գոյություն չունի, այս էջը փակված է, որ արցախահայության իրավունքների հարցը նույնպես որևէ կերպ չի քննարկվում։ Սրանք այն գլխավոր ազդանշաններն են, որ ուղարկել է Փաշինյանը»,- ասել է Գրիգորյանը։
Նա ընդգծել է, որ 2019 թվականին ԵԱՀԿ Մինսկի խմբի համանախագահները առաջարկությունների նոր փաթեթ էին ուղարկել Երևան։ Այն ժամանակ դեռ ուկրաինական ճգնաժամ չկար, աշխարհաքաղաքական հիմնական կենտրոնների միջև կար կոնսենսուս, և հնարավորություն կար բանակցությունների միջոցով լուծել խնդիրները։
«Բայց Փաշինյանն ասում է. «Մենք այն ժամանակ էլ հասկացանում էինք, որ խնդիրը լուծում չունի»։ Իսկ հետո, չգիտես ինչու, Ստեփանակերտում հայտարարեց. «Արցախը Հայաստան է, և վերջ»։
Սա, ինչպես նաև նրա հետագա գործողությունները Ադրբեջանին ազատություն տվեցին Արցախի դեմ ագրեսիայի համար։ Իսկ միջազգային հանրությունը լռեց, քանի որ Բաքուն, ինչպեսև հիմա է անում, վկայակոչում էր Փաշինյանի հայտարարություններն ու գործողությունները։
Եթե Արցախի հարցը լուծված էր, ապա ինչո՞ւ էր Փաշինյանը ամիսը մեկ գնում այնտեղ։ Ինչո՞ւ էր ասում, որ եթե Արցախը չպահենք, ուրեմն Հայաստանն էլ չենք պահի։ Ամեն ինչ ստացվեց այնպես, ինչպես ասաց նրա կինը. «Հազարավոր տղաներ իրենց կյանքը տվել են հանուն ոչնչի»,- նկատել է պատգամավորը՝ հավելելով, որ Փաշինյանի երեկվա հայտարարությունները լի էին հակաարցախյան թեզերով։
Նրա գնահատմամբ, Փաշինյանը 2018 թվականից հստակ քաղաքականություն է վարել Արցախից ազատվելու համար։
«Արդարանալու համար նա քանդում է մեր պետության հիմքերը։ Փաշինյանն, ըստ էության, խոստովանել է, որ իմացել է Արցախի վրա ծրագրված հարձակման մասին և ոչինչ չի արել։ Էլ ի՞նչ տեսք ունի պետական դավաճանությունը»,- եզրափակել է Գրիգորյանը։
