Միրզոյան. «3+3» ձևաչափը բավականին հարմար հարթակ է տարածաշրջանային խնդիրների քննարկման համար

«3+3» ձևաչափը բավականին հարմար հարթակ է տարածաշրջանային խնդիրների քննարկման համար։ Այս մասին հոկտեմբերի 25-ին Ազգային ժողովի նիստում կառավարության ժամին հայտարարել է Հայաստանի արտգործնախարար Արարատ Միրզոյանը՝ մեկնաբանելով հոկտեմբերի 23-ին Թեհրանում կայացած նախարարական հանդիպմանը իր մասնակցությունը։

«3+3» հարթակը, ըստ նրա, հարմար ձևաչափ է տարածաշրջանի այլ երկրների հետ շփման և ընդհանուր հետաքրքրություն ներկայացնող թեմաների քննարկման համար։

«Ինչ վերաբերում է տարածաշրջանային հաղորդակցությունների ապաշրջափակմանը, ապա Հայաստանն ինքը շահագրգռված է, և նրա մոտեցումներն այս հարցում չեն փոխվել։ Այլ բան, որ որոշ երկրներ փորձում են որոշակի ենթատեքստ մտցնել այս հայեցակարգի մեջ։ Սա մեզ համար անընդունելի է»,- ասել է Միրզոյանը՝ պատասխանելով պատգամավորների հարցերին։

Նախարարը, մասնավորապես, ակնարկել է Ադրբեջանի փորձերը՝ դիտարկելու տարածաշրջանային հաղորդակցությունների ապաշրջափակման հարցը Նախիջևան արտատարածքային միջանցք ձեռք բերելու համատեքստում։ Միևնույն ժամանակ, Երևանը բազմիցս հայտարարել է, որ իր համար անընդունելի է «միջանցքային» տրամաբանությունը։

Բանակցությունները տեղի են ունեցել Հայաստանի, Ռուսաստանի, Իրանի, Ադրբեջանի և Թուրքիայի արտաքին գործերի նախարարների մասնակցությամբ։ Վրաստանը նախկինի պես հրաժարվում է միանալ ֆորմատին։