Դիվանագիտական կորպուսում ցնցումներ են սպասվում

Հայաստանի դիվանագիտական կորպուսում առաջիկայում մի շարք փոփոխություններ են իրականացվելու։ Նիկոլ Փաշինյանը մտադիր է հեռացնել իրեն ոչ հավատարիմ, ինչպես նաև չաշխատող դեսպաններին։ Երեկ հայտնի դարձավ, որ նախագահ Վահագն Խաչատուրյանի հրամանագրով հետ է կանչվել Բալթյան երեք երկրներում Հայաստանի դեսպան նշանակված Հովհաննես Իգիթյանը։

Իգիթյանը «Քաղաքացիական պայմանագրից» պատգամավոր էր եղել նախորդ գումարման Ազգային ժողովում, իսկ այս անգամ նրան Ազգային ժողով չէին տարել, այլ նշանակել էին չափազանց ծանր և պատասխանատու պաշտոնի՝ միանգամից երեք երկրներում դեսպան։ Նախկին դեսպանների բավական ակտիվ և արդյունավետ գործունեության պայմաններում Իգիթյանի բացարձակ իներտ վարքը և նույնիսկ սեփական իշխանության օգտին չաշխատելու, փոխարենը տարատեսակ ֆուրշեթներին ինքնամոռաց մասնակցելու հանգամանքը, զայրացրել էր անգամ նրա մտերիմներին, որոնք Փաշինյանին զգուշացնում էին, որ Բալթյան երկրներում Ադրբեջանն, օրինակ, բավականին լուրջ աշխատանքներ էր կարողանում անել, իսկ Հայաստանի դեսպանը նույնիսկ տարրական պարտականությունները չի կատարում։

Ի վերջո, որոշում է կայացվել հետ կանչել Իգիթյանին, իսկ Լիտվայում դեսպան է նշանակվել ԱԳՆ Եվրոպայի վարչության պետ Արամ Մարգարյանը։ Առաջիկայում նրան կնշանակեն նաև դեսպան Էստոնիայում և Լատվիայում, քանի որ այդ երեք երկրներում դեսպանի պարտականությունները սովորաբար կատարում է միևնույն անձը։ Փաշինյանը նաև որոշում է կայացրել հետ կանչել իր իսկ նշանակած դեսպանին՝ պաշտպանության նախկին նախարար Վաղարշակ Հարությունյանին Ռուսաստանից։

Միևնույն ժամանակ գործող իշխանությունները չեն կարողանում համապատասխան ագրեման ստանալ իրենց որևէ կողմնակցի համար։ Գուրգեն Արսենյանի ագրեմանը Մոսկվան մերժել է, իսկ այլ ՔՊ-ականի Կրեմլում չեն էլ ցանկանում տեսնել։ Այդուհանդերձ Փաշինյանն այժմ շարունակում է աշխատանքը՝ փորձելով որևէ հարմար մեկին գտնել և նրա համար ագրեման ստանալ։ Մի շարք դեսպանների ևս առաջիկայում հետ են կանչելու, իսկ նրանց փոխարեն ԱԳՆ կադրային դիվանագետներ կամ Փաշինյանի որոշ կողմնակիցների կնշանակեն։ ՔՊ-ում մի քանիսը լուրջ ախորժակ ունեն հարմար երկրներում դեսպան նշանակվելու և Հայաստանից շուտ ճողոպրելու վերաբերյալ։ 

Աննա Սարգսյան