«Ո՞վ է հաշտեցնելու Բաքվին ու Երևանին. ավելի ու ավելի են շատանում միջնորդները»
ՎԵՐԼՈՒԾՈՒԹՅՈՒՆՆԵՐ
Ng.ru-ն գրում է, որ Վրաստանի խորհրդարանի նախագահ Շալվա Պապուաշվիլին հայտարարել է, որ իր երկիրը գործնականում միակ պետությունն է, որին լիովին վստահում են Հայաստանն ու Ադրբեջանը։ Այդ առումով, հենվելով Թբիլիսիի հետ բարիդրացիական հարաբերությունների վրա, Երևանն ու Բաքուն կկարողանան լուծել իրենց միջև հակամարտությունը և ձևավորել «ընդհանուր տարածաշրջանային վստահություն», կարծիք է հայտնել քաղաքական գործիչը։ Միաժամանակ Պապուաշվիլին հիշեցրել է, որ 2021 թվականի հունիսին Վրաստանի միջնորդությամբ Ադրբեջանի իշխանություններն ազատ են արձակել 15 հայ գերիների, իսկ Հայաստանը ականապատ դաշտերի քարտեզներ է հանձնել ադրբեջանական կողմին։
ՄԳԻՄՕ-ի Հետխորհրդային հետազոտությունների կենտրոնի կովկասի բաժնի գլխավոր գիտաշխատող Ալեքսանդր Կռիլովը ng.ru-ի հետ զրույցում ասել է, որ Մոսկվան կարող էր խաղաղ ճանապարհով լուծել Հայաստանի և Ադրբեջանի միջև հակամարտությունը, սակայն ԵՄ-ն ու նրա աջակիցները Հայաստանում դա թույլ չեն տվել։ «Թբիլիսիի դեպքում հիմնական հարցն այն է, թե ո՞վ է լինելու ձեռք բերված պայմանավորվածությունների երաշխավորը»,- պարզաբանել է Կռիլովը։ Իսկ Կովկասի բաժնի ղեկավար Վլադիմիր Նովիկովն էլ կարծում է, որ Վրաստանն առաջին հերթին փորձում է Եվրամիությանը ցույց տալ իր կարևորությունը։ «Թբիլիսին իրեն դիրքավորում է որպես անկախ տարածաշրջանային խաղացող, որը կարող է լուծել հակամարտությունները հարևանների միջև,- կարծում է Նովիկովը, - այնուամենայնիվ, Հայաստանի և Ադրբեջանի միջև խնդիրները չեն վերացել ինքնահռչակ Լեռնային Ղարաբաղի Հանրապետության անհետացումից հետո։ Կա մտավախություն, որ Զանգեզուրի միջանցքում պատերազմ կարող է բռնկվել, և մեծ հարց է այն, թե ինչպե՞ս է Վրաստանը գլուխ հանելու դրանից»։
Հայ քաղաքագետ Ջոնի Մելիքյանը ng.ru-ին ասել է, որ Երևանը միշտ հարգանքով է վերաբերվել Թբիլիսիին, սակայն այս փուլում վրացական հարթակը դժվար թե ավելի արդյունավետ լինի, քան եվրոպականը կամ ռուսականը։ «Հետկոնֆլիկտային շրջանում այնտեղ կարող են քննարկվել համատեղ զարգացման հետ կապված որոշ գործնական հարցեր, սակայն այժմ մենք գտնվում ենք հետպատերազմական կամ նույնիսկ միջպատերազմական շրջանում»,- պարզաբանել է փորձագետը։ Միաժամանակ նա չի բացառել, որ մինչև 2023 թվականի վերջը Մոսկվան կամ Բրյուսելը կարող են օգնել Երևանին և Բաքվին առաջընթաց գրանցել հարաբերությունների բարելավման գործում։
Նրա հետ համամիտ է ադրբեջանցի քաղաքական վերլուծաբան Իլգար Վելիզադեն։ «Վրացական միջնորդությունը էապես տարբեր է ռուսականից և եվրոպականից։ Ավելի շուտ մենք կստանանք եռակողմ երկխոսություն Հարավային Կովկասի զարգացման շուրջ։ Շատ հարցեր կան կապված տնտեսական համագործակցության, տրանսպորտային հաղորդակցության և այլնի հետ։ Նման մի բան կա Կենտրոնական Ասիայում, որտեղ նույնպես ոչ բոլորն ունեն հիանալի հարաբերություններ։ Սակայն մինչ այդ Հայաստանն ու Ադրբեջանը պետք է խաղաղության պայմանագիր ստորագրեն»,- ասել է Վելիզադեն։
Նյութը հրապարակման պատրաստեց Կամո Խաչիկյանը
