Արևմուտքը զգուշացնում է, բայց չի աջակցում

 Արևմուտքն այլևս անթաքույց Փաշինյանին զգուշացնում է, որ Ադրբեջանը կարող է ներխուժել Հայաստանի տարածք, իսկ իրենք առանձնապես ջանքեր չեն գործադրելու այդ ներխուժումը դադարեցնելու ուղղությամբ՝ բացառապես մեկ-երկու հայտարարությունից կամ բանաձևից բացի։ Առաջատար «Պոլիտիկո» պարբերականը տեղեկություն է տարածել, թե ԱՄՆ պետքարտուղար Էնթոնի Բլինքենը բրիֆինգ է ունեցել մի շարք ազդեցիկ կոնգրեսականների հետ և նախազգուշացրել, որ առաջիկա շաբաթներին Ադրբեջանը կարող է ներխուժել արդեն Հայաստանի տարածք, ընդ որում այդ խոսակցություններին մասնակից երկու կոնգրեսականներ անանունության սկզբունքով «Պոլիտիկո»-ին տեղեկացրել են, թե Բլինքենը որևէ հստակ բան չի ասել Հայաստանին աջակցելու մասով, ընդհակառակը Բլինքենը միայն նշել է, թե իրենք երկարաձգելու են ազատության ակտի 907-րդ ուղղման սահմանափակումները, որով Ադրբեջանը զրկվում է ռազմական չնչին օգնությունից, որը Միացյալ Նահանգները տրամադրում է Բաքվին։ Բլինքենն ընդամենը հույս է հայտնել Հայաստանի և Ադրբեջանի միջև բանակցային գործընթացը շարունակելու վերաբերյալ։

Ոչ միայն «Պոլիտիկոն», այլ նաև այլ պարբերականներ չափազանց հավանական են համարում Ադրբեջանի ներխուժումը։

Washington Post-ը նշել է, թե Ադրբեջանը ճնշում է գործադրում Երևանի վրա՝ պահանջելով Զանգեզուրի միջանցքի անխոչընդոտ հասանելիություն։ Ալիևը հասկացրել է, որ Բաքուն ուժ կկիրառի, որպեսզի զավթի միջանցքը, եթե 2020թ. համաձայնագիրը չկատարվի։ Միջազգային հարաբերությունների գերմանական խորհրդի Հարավային Կովկասի գծով փորձագետ Շթեֆան Մեյսթերը սրման սպառնալիքը միանգամայն հավանական է համարում։

Իսկ ամերիկյան Թայմ ամսագիրն անխուսափելի է համարում Լեռնային Ղարաբաղում մշակութային ցեղասպանությունը՝ հաշվի առնելով, թե ինչ ճակատագրի է արժանացել հայկական մշակութային ժառանգությունը Նախիջևանում Ադրբեջանի տիրապետության տակ։ Հեղինակը հիշեցրել է Ջուղայի խաչքարերի ոչնչացումը, Ջաբրայիլի Սուրբ Աստվածածին եկեղեցու հողին հավասարեցումը, Մեծ Թաղեր գյուղի հայկական գերեզմանոցի ոչնչացումը, ինչպես նաև Շուշիի Սուրբ Ղազանչեցոց եկեղեցու գնդակոծումը և վանդալիզմի ենթարկումը։

Նինա Խանումյան