Փաշինյանը չի հերքում անկլավների թեման

Հայաստանի վարչապետի պաշտոնը զբաղեցնող Նիկոլ Փաշինյանը չի հերքում անկլավների հարցի քննարկումները խաղաղության պայմանագրում։ Օրեր առաջ Ադրբեջանի նախագահ Իլհամ Ալիևը զանգահարել էր Եվրամիության խորհրդի նախագահ Շառլ Միշելին, քննադատել եվրախորհրդարանի ընդունած բանաձևը, ինչպես նաև հայտարարել, թե Բաքուն չի մասնակցել Գրանադայի հանդիպմանը՝ Ֆրանսիայի կողմնակալ դիրքորոշման պատճառով։ Նա նաև նշել էր, որ Ֆրանսիայի կողմից Հայաստանին զենք տրամադրելու մոտեցումը ծառայում է ոչ թե խաղաղությանը, այլ նոր հակամարտությանը, իսկ եթե տարածաշրջանում նորից հակամարտություն սկսվի, մեղավորը Ֆրանսիան կլինի,- սպառնացել էր Ալիևը։

Ամենավտանգավոր դրույթը, որ հնչեցրել էր Ադրբեջանի նախագահը, անկլավների վերաբերյալ էր, Ալիևը հիշեցրել էր 8 գյուղերի մասին՝ շեշտելով, որ դրանք գտնվում են «Հայաստանի օկուպացիայի տակ», ապա ընդգծել դրանց «ազատագրման» կարևորությունը։

Երեկ հանրային հեռուստաընկերությանը տված հարցազրույցում Նիկոլ Փաշինյանը չէր հերքել անկլավների թեման, նշել, թե 29800 կմ քառակուսու մեջ մտնում են նաև Արծվաշենը և Հայաստանի ոչ մի իշխանություն իրավունք չունի խաչ քաշել ՀՀ ինքնիշխան տարածքի վրա։ Միևնույն ժամանակ Փաշինյանի հայտարարությունները բավականին վտանգավոր և ծանր մտորումների տեղիք են տալիս։ Փաստացի, Արծվաշենը հավասարեցնելով Ադրբեջանի նշած անկլավների հետ, Նիկոլ Փաշինյանը հայտարարում է, թե հայկական կողմն ունի Ադրբեջանի կողմից բռնազավթված տարածքներ Տավուշի մարզի Բերքաբեր, Վազաշեն, Պառավաքար, Այգեհովիտ գյուղերում և այլ տարածքներում։ Այս տարածքները չափազանց փոքր են իրենց, թե՛ չափերով, թե՛ ռազմավարական նշանակությամբ դրանք անկլավների հետ համեմատելու համար, միակը, իր չափերով, որ կարող է համեմատվել Ադրբեջանի պահանջած անկլավների հետ իր չափերով՝ Արծվաշենն է, բայց այստեղ, ըստ Փաշինյանի, կա մի կարևոր նրբություն, ով էլ խոսի անկլավների մասին ինքը պետք է սեղանին դնի քարտեզ։ «Երբ դրվեց անկլավների հարցը, բազմաթիվ հարցեր են ծագելու, անկլավների սահմաններից սահմանազատնման հարց կա, հասանելիության հարց կա, սերվիտուտի հարց կա, սահմանների պաշտպանության հարց կա։ Այդ տարածքներում զինված ուժերի և չներկայության հարց կա։ Անկլավ նշանակում է, որ դու ուրիշի տարածքով պետք է անցնես, ո՞նց դու պիտի անցնես ուրիշի տարածքով, ինչ իրավական նրբություններ ունի այս հարցը»,- փորձում էր սվաղել Նիկոլ Փաշինյանը՝ սրանով հերթական անգամ ամրագրելով այն մտայնությունը, որ գործող վարչախումբը մտադիր է Ադրբեջանին հանձնել անկլավները, փոխարենը ոչինչ չստանալով։

Նույնիսկ, եթե Ադրբեջանը Հայաստանին վերադարձնի Արծվաշենը, գործող իշխանությունները չունեն այդքան հնարավորություն և ուժ, այն Հայաստանի տարածքում պահելու, դրա անվտանգությունն ապահովելու համար և կարճ ժամանակ հետո Ադրբեջանի համար որևէ բարդություն չի ներկայացնելու այն գրավելը։

Աննա Բուդաղյան