ԱՄՆ Պետդեպի՝ Կովկասում բանակցությունների գծով ավագ խորհրդականը հանդիպել է Ադրբեջանի արտգործնախարարի հետ
ՔԱՂԱՔԱԿԱՆՈՒԹՅՈՒՆ
ԱՄՆ Պետդեպարտամենտի Հարավային Կովկասում բանակցությունների գծով ավագ խորհրդական Լուի Բոնոն հանդիպել է Ադրբեջանի արտգործնախարար Ջեյհուն Բայրամովի հետ, հայտնում է Ադրբեջանի ԱԳՆ մամուլի ծառայությունը։
«Հանդիպման ընթացքում քննարկվել են տարածաշրջանում տիրող իրավիճակը, Ադրբեջանի և Հայաստանի միջև հարաբերությունների կարգավորման և խաղաղության գործընթացը, առկա սպառնալիքներն ու մարտահրավերները»,- ասված է հաղորդագրությունում։
Բայրամովը Բոնոյին ասել է, որ «խոչընդոտող կողմն Աղդամ-Խանքենդի (Ստեփանակերտ - խմբ.) և Լաչին (Բերձոր - խմբ.) ճանապարհների միաժամանակյա բացման մասին համաձայնագրի իրականացմանը, որը ձեռք է բերվել Ադրբեջանի նախագահ Իլհամ Ալիևի և ԱՄՆ-ի Պետքարտուղար Անտոնի Բլինկենի միջև սեպտեմբերի 1-ին կայացած զրույցի ընթացքում, Հայաստանն է և նրա ստեղծած անօրինական ռեժիմը»։
Միաժամանակ, Բայրամովը հերքել է Արցախում շրջափակման և հումանիտար ճգնաժամի փաստը։
«Ջեյհուն Բայրամովը հայտարարել է տարածաշրջանում տիրող իրավիճակին քաջատեղյակ մի շարք միջազգային գործընկերների, այդ թվում՝ ԱՄՆ-ի կողմից հայկական կողմի հայտարարությունների կրկնման անընդունելիությունը, և ընդգծել, որ չնայած Հայաստանի մշտական ռազմաքաղաքական սադրանքներին՝ Ադրբեջանի դեմ իր զրպարտչական արշավն ամբողջ աշխարհում, աջակցությունը մեր տարածքներում անջատողականությանը, Ադրբեջանը շարունակում է կառուցողական դիրքորոշում ունենալ»,- ասվում է ուղերձում։
«Ադրբեջանի ԱԳՆ ղեկավարը ափսոսանք է հայտնել, որ Հայաստանի անհիմն պնդումները, որոնք նա տարածում է Ադրբեջանի տարածքներում հայկական զինված ուժերի ներկայությունից ուշադրությունը շեղելու և միջազգային հանրությանը մոլորեցնելու նպատակով, արտացոլվել են Եվրոպայի և Եվրասիայի հարցերով պետքարտուղարի օգնականի պաշտոնակատար Յուրի Կիմի ելույթում»,- ասված է ուղերձում։
