Փաշինյանի զանգերին Պուտինը չի պատասխանել
ՎԵՐԼՈՒԾՈՒԹՅՈՒՆՆԵՐ
Սեպտեմբերի 9-ին Փաշինյանը հեռախոսազրույց է ունեցել ԱՄՆ պետքարտուղարի, Ֆրանսիայի նախագահի, Գերմանիայի կանցլերի, Իրանի նախագահի և Վրաստանի վարչապետի հետ։ Երկու օր անց էլ հեռախոսազրույց է ունեցել Թուրքիայի նախագահ Ռեջեփ Թայիբ էրդողանի հետ։ Միակ գերտերության ներկայացուցիչը, որին Փաշինյանը չի զանգահարել Ռուսաստանի նախագահ Վլադիմիր Պուտինն է։ Եվ այս հանգամանքը լուրջ զարմանք է հարուցել։
Ի դեպ, Փաշինյանը Վլադիմիր Պուտինի հետ վերջին անգամ հեռախոսազրույց ունեցել է այս տարվա հուլիսի 5-ին, անցել է երկու ամսից ավելի։ Փաշինյանն ինքը փորձել է անձամբ կապվել Պուտինի հետ։ Օրեր առաջ Ռուսաստանում Հայաստանի դեսպան Վաղարշակ Հարությունյանին կանչել էին ԱԳՆ և ամենախիստ բողոքի նոտան էին հղել՝ պարզ ակնարկելով, թե մի շարք դեպքերում Հայաստանի իշխանությունները ոչ բարեկամական քայլեր են ձեռնարկում Ռուսաստանի նկատմամբ։ Բողոքի այս նոտան չափազանց ահաբեկել էր Նիկոլ Փաշինյանին, ընդ որում և առաջին հերթին ֆիզիկական առումով և դա է պատճառը, որ անմիջապես Հայաստանում վագների հազարավոր մարտիկների մասին կեղծ տեղեկություններ տարածեցին կառավարությանը մերձ տելեգրամյան ալիքները, իսկ նրա թիկնազորի պետ, ՊՊԾ պետ Սարգիս Հովհաննիսյանին ազատեցին աշխատանքից։
Փաշինյանը բողոքի նոտայից հետո, արտգործնախարար Արարատ Միրզոյանին հանձնարարել է զանգահարել Սերգեյ Լավրովին, սակայն արտգործնախարարի հեռախոսազանգը մերժել են, ընդհանրապես չեն պատասխանել։ Դրանից հետո Փաշինյանն ինքն է անձամբ փորձել կապվել Պուտինի հետ, սակայն Կրեմլում որևէ մեկը հեռախոս չի վերցրել, որպեսզի նույնիսկ մերժի։ Մեկ օր տվայտվելուց հետո, Փաշինյանը կրկին փորձել է զանահարել, իսկ չհաջողելուց հետո, արդեն, ծավալուն նամակ է գրել։ Ի դեպ այդ նամակի մասին ՌԴ նախագահը՝ Վլադիմիր Պուտինը, քամահրական տոնով արձանագրել էր Վլադիվաստոկում կայացած համաժողովի ընթացքում, նշել, թե Փաշինյանն իրեն նամակ է ուղարկել և կոնտակտները պահպանվում են։ Այդ նամակում Նիկոլ Փաշինյանը փորձել է բացատրել, որ Հռոմի ստատուտը Ռուսասատնի նախագահի դեմ չէ, հայ–ամերիկյան զորավարժությունները Ռուսաստանի դեմ չեն և, ընդհանրապես, ռուսական կողմը ճիշտ չի հասկանում Նիկոլ Փաշինյանի քայլերը։
Իհարկե Փաշինյանը, ի տարբերություն բազմաթիվ հայաստանյան գործիչների, բավականին լուրջ հոտառություն ունի և հասկանում է, որ վտանգը ոչ միայն չի անցել, այլև օրեցօր ավելի խորանում է և առաջին հերթին կապված հենց իր անձի հետ, դա է պատճառը, որ նա գիտակցում է, որ ոչ մի այլ տարբերակ չունի և պետք է շարունակի հոխորտալ, ինչն էլ, ի դեպ, երեկ անում էր Ազգային ժողովի ամբիոնից։
Անահիտ Բարսեղյան
