Ինչու՞ Փաշինյանը նոր հիշեց Ավինյանին. Վարչախումբը ձախողում է ընտրությունները
ՎԵՐԼՈՒԾՈՒԹՅՈՒՆՆԵՐ
Երևանի ավագանու քարոզարշավի ողջ ընթացքում Նիկոլ Փաշինյանն առանձնապես չէր անդրադառնում թեկնածուներին, իսկ նախօրեին Հանրային հեռուստաընկերությանը տված ծավալուն հարցազրույցի մեծ մասը նվիրել է հենց Երևանի ավագանու ընտրություններին։ Ինչու՞ հենց այս պահին քաղաքապետի թեմայով Փաշինյանը որոշեց խոսել։ Ըստ էության նա անդրադարձել է Երևանի ավագանու ընտրություններին, երբ «Քաղպայմանագրում» համոզվել են, որ Տիգրան Ավինյանն ամեն ինչ ձախողել է, իսկ նրա վարկանիշը նույնիսկ կայուն անվանել հնարավոր չէ։
Ավինյանի կերպարը, խոսելու ոճը, տարօրինակ վարքը, երբեմն ժարգոնով քաղաքացիների հետ հարաբերվելը վանել է նույնիսկ նրանց, ովքեր նախկին փոխվարչապետին ընկալում էին քիչ թե շատ քաղաքակիրթ, հավասարակշռված մարդ։ Պարզվեց, որ նրա այս կերպարը հօդս է ցնդել, վարկանիշը կանգնել էր, իսկ հիմա աստիճանաբար նվազում է։ «Քաղպայմանագրում» հստակ գիտակցում են, որ Ավինյանն այլևս ինքնուրույն չի կարողանալու խաղալ, իհարկե, ինքը՝ Փաշինյանը, դեմ չէ դրան և ամեն ինչ արել է, որպեսզի Տիգրան Ավինյանն առանց իրեն չկարողանա գործոն դառնալ։
Ավինյանը, ի դեպ, երկար ժամանակ դիստանցավորվում էր «Քաղպայմանագրից», տարբեր հարցազրույցներում փորձում առանձին, միայնակ գայլի կերպար ընդունել և հնարավորինս հեռու մնալ Փաշինյանի հետ ասոցացվելուց։ Իսկ այժմ Փաշինյանը նույնիսկ արհամարհական է խոսում Տիգրան Ավինյանի մասին, Պետրոս Ղազարյանի դիտարկմանը, թե Տիգրան Ավինյանն իր կողքին չի եղել 2021 թվականի Խորհրդարանական արտահերթ ընտրություններում, Փաշինյանն իմիջայլոց հայտարարել է, թե Ավինյանը միշտ էլ քաղաքական թիմի անդամ է եղել և կա։ Փաստացի, Նիկոլ Փաշինյանն ինքը սպասում էր, որ Ավինյանն արձանագրի իր ձախողումը, և կարողանա Փաշինյանը մտնել իբր իրավիճակը փրկելու համար։ Այս կերպ վարչախմբի պարագլուխը ցանկանում է, որ յուրաքանչյուր ՔՊ-ական իրեն պարտական զգա իր հետ հարաբերություններում, ինչը սակայն այս դեպքում կարող է վատ արդյունք ունենալ և իրավիճակն արդեն չափազանց ծանր է և նույնիսկ Փաշինյանի խառնվելը չի կարողանա փոխել վիճակը։
Ի դեպ, Փաշինյանին նաև դրսի իր հովանավորները, նախ և առաջ ամենիկացիները, պարզ ասում են, որ այս ընտրություններն իր լեգիտիմության ընտրություններն են լինելու և ձախողման դեպքում նա կարող է լուրջ խնդիրների առաջ կանգնել և մինչդեռ Փաշինյանի ռեյտինգը չափազանց ցածր է, թեպետ նա ունի իր կայուն ընտրազանգվածը, որոնց եթե կոչ անի, ապա «պոլի փեդ» էլ կընտրեն, բայց դրանք ոչ բոլորն են, Փաշինյանի վարկանիշն իր սեփականն է, ոչ կուսակցությանը և բոլոր «պոլի փեդերի» կամ «ուսապարկերի» վրա չի տարածվում, առավել ևս, որ Փաշինյանի առնչությունը Տիգրան Ավինյանին կարող է ոչ թե դրական, այլ բացասական դեր խաղալ։
Աննա Մարկոսյան
