Պուտինի կարմիր քարտը Փաշինյանին

Հայ-ռուսական վերջին շաբաթների սրումը երեկ իր հերթական հանգրվանին հասավ Վլադիվաստոկում արևելյան տնտեսական ֆորումի շրջանակներում, երբ Հայաստանի քննադատությանը միացավ Ռուսաստանի նախագահ Վլադիմիր Պուտինը՝ ըստ էության կարմիր քարտ ցույց տալով Նիկոլ Փաշինյանին։ Անդրադառնալով Լեռնային Ղարաբաղի հիմնախնդիրներին, Լաչինի միջանցքի շրջափակմանն ու այլ հարցերին՝ Վլադիմիր Պուտինը նշել է, թե նախ չի տեսնում, որ ինչ-որ փոփոխություն, շրջադարձ կա հայ-ռուսական հարաբերություններում։

Ռուսաստանի նախագահը հիշեցրել է, որ իրենք ժամանակին առաջարկել են կարգավորման իրենց տարբերակը, Հայաստանն Ադրբեջանի հետ կոնֆլիկտից հետո վերահսկել է 7 շրջան, իսկ Ռուսաստանն առաջարկել է այնպես պայմանավորվել, որ Քելբաջարն ու Լաչինը մնան Հայաստանի փաստացի իրավազորության տակ, բայց Հայաստանի ղեկավարությունը դրան չի համաձայնվել, թեև մեկ տասնամյակ փորձել են համոզել, իսկ հարցերին պատասխանել են, թե կկռվեն։ Ի վերջո, ըստ Պուտինի՝ ամեն բան բերեց ներկայիս իրավիճակին և խնդիրը միայն հետևանքները չեն, այլ այն, որ Հայաստանի գործող իշխանությունները ճանաչում է Ադրբեջանի սուվերենությունը Ղարաբաղի նկատմամբ։ «Հիմա ինձ Ալիևն է ասում, որ Հայաստանը ճանաչել է, որ Ղարաբաղի կարգավիճակի հարցն այլևս չկա, այն լուծված է, Հայաստանի ղեկավարությունն այդ մասին հրապարակային հայտարարել է»,- ասել է Վլադիմիր Պուտինը և հավելել. «Եթե Հայաստանը ճանաչում է, ինչ կարող ենք մենք անել այստեղ, իհարկե, հումանիտար հարցեր և մեր խաղաղապահների մանդատի հարցերն են ծագում, էթնիկ զտման հարցերն են ծագում։ Հույս ունեմ Ադրբեջանի ղեկավարությունը շահագրգռված չէ էթնիկ զտումներով, այլ շահագրգռված է, որ պրոցեսը փափուկ անցնի։ Եթե Հայաստանը ճանաչել է Ղարաբաղն Ադրբեջանի մաս, ուրեմն վերջ, այս մասը խնդրի բանալին է, Ղարաբաղի կարգավիճակը որոշել է հենց Հայաստանը»։

Ըստ էության նրա այս արձանագրումները վկայում են, որ Հայաստանի գործող իշխանությունները վերջին շրջանում արտաքին քաղաքական վեկտորը փոխելու իրենց մղումներում բնավ էլ ազնիվ չեն և փորձում են հնարավոր ողջ մեղքը բարդել միայն ռազմավարական դաշնակցի վրա։ Ռուսաստանի նկատմամբ հավակնություններ և դժգոհություններ իհարկե կարող են լինել, բայց այն ինչ անում է Հայաստանի գործող վարչախումբը միայն ու միայն լրջագույն խնդիրներ է հարուցելու հենց Հայաստանի համար։ Իհարկե Փաշինյանը գիտակցում է իր արարքի ողջ հետևանքները, սակայն սեփական իշխանությունը պահպանելու և վերարտադրելու իր ձգտման մեջ ոչնչի առջև կանգ չի առնում։

Թինա Մարգարյան