Ինչու՞ ընտրել «Ապրելու երկիր» կուսակցությանը

Երևանի ավագանու ընտրություններում ամենակարևոր հարցը, որ ծառացած է մեր ընտրողների առջև, թե ու՞մ և ինչի՞ համար պետք է ընտրել։ Գործող իշխանություններին՝ Նիկոլ Փաշինյանի գլխավորությամբ, չընտրելու փաստարկներն այնքան շատ են և այնքան սարսափելի, որ նույնիսկ չարժե կանգ առնել այդ հանգամանքի վրա։ Իհարկե «Քաղպայմանագիրն» ունի սեփական ընտրողները, դրանք այն մարդիկ են, որոնք նախ գտնվում են վարչական վերահսկողության ներքո, վախենում են կորցնել ինչ-ինչ արտոնություններ և զրկվել պետական գանձարանը դատարկելու հնարավորությունից, նաև մի բավական զգալի սեգմենտ, որը չափազանց ուրախ է երկրին բաժին հասած արհավիրքներով և դարձել է Փաշինյանի՝ այսպես կոչված զոմբին։

Ընտրություններին մասնակցում են նաև բազմաթիվ քաղաքական ուժեր, որոնք ոչնչով չեն տարբերվում գործող իշխանություններից, ավելին նրանց կցորդներն են և ընտրություններին առավելագույնը մասնակցում են իրական ընդդիմության ձայները փոշիացնելու, իսկ հրաշքով ավագանու կազմ անցնելու դեպքում, քաղաքապետարանում արտոնություններ ստանալու, պաշտոնների բաժանմանը մասնակցելու ակնկալիքով։ Եվ միայն փոքրաթիվ ուժեր են, որոնք իսկապես ունեն լուրջ մտադրություն՝ փոխել Երևանում իշխանությունը, իսկ Երևանից հետո արդեն կհասնի հանրապետության հերթը։

Եվ ինչու՞ պետք է գնալ և ընտրել օրինակ «Ապրելու երկիր» կուսակցությանը։ Ըստ Երևանի քաղաքապետի թեկնածու Մանե Թանդիլյանի՝ «Ապրելու երկիրն» ունի անցած ճանապարհ, նախորդ ընտրական խոստումների 80 %-ն արդեն գործի է վերածել։ Հիշեցնենք, որ «Ապրելու երկիրը» մի շարք համայնքներում հաղթել է «Քաղաքացիական պայմանագրին» և այդ համայնքներն այսօր ծաղկում են, առաջընթացը տեսանելի է նույնիսկ «Քաղաքացիական պայմանագիր» կուսակցության ընտրողների համար։ Ըստ Թանդիլյանի՝ «Ապրելու երկիրը» սահմանում է՝ խոսքն աշխատանքի վերածելու հստակ ժամկետներ, նաև «Ապրելու երկիրը» հայամետ է, բարձրագույն արժեքը Հայաստանի շահն է, նշում է Մանե Թանդիլյանը։ Ահա հենց այդ չափազանց պարզ պատճառների համար էլ ընտրողը կարող է և պետք է նաև ընտրի «Ապրելու երկիր» կուսակցությանը։

Աննա Մանուկյան