Կարծիք. Իսրայելը Հայաստանի շուրջ բացասական ֆոն է ստեղծում Բաքվին արդարացնելու համար
ՎԵՐԼՈՒԾՈՒԹՅՈՒՆՆԵՐ
Rossaprimavera.ru-ն գրում է, որ Իսրայելի և ընդհանրապես Արևմուտքի տեղեկատվական տարածքում տարածվում է այն թեզը, որ Հայաստանը վատ Իրանի և Ռուսաստանի դաշնակիցն է: Իր Telegram ալիքում նման կարծիք է արտահայտել պատմական գիտությունների թեկնածու, արևելագետ Սերգեյ Մելքոնյանը։ Նա ուշադրություն է հրավիրել մի հոդվածի վրա, որը հրապարակվել է երկրի պաշտպանության նախարարությանը մոտ գտնվող իսրայելական պորտալում։
«Իրանը Ռուսաստանին զենք է մատակարարում տարբեր տրանսպորտային միջոցներով, որոնցից մեկը Հայաստանի միջոցով… Հնդկաստանը զենք է վաճառում Հայաստանին, և Իսրայելում ոմանք մտահոգություն են հայտնում, որ նման զենքը կարող է հայտնվել իրանցիների ձեռքում, իսկ այնտեղից էլ Սիրիայում»,- ասվում է իսրայելական հոդվածում:
Փորձագետի կարծիքով շատ կասկածելի է այն թեզը, թե Իրանը Հայաստանի միջոցով զենք է մատակարարում Ռուսաստանին. «Ինչու՞ պետք է Իրանը զենք մատակարարեր Ռուսաստանին Հայաստանի միջոցով, որն ուղիղ ելք չունի դեպի Ռուսաստան, եթե դա կարելի է անել օդային ճանապարհով՝ Կասպից ծովի վրայով, որը շատ ավելի արագ ու հեշտ է»: Նա նաև տարակուսանք է հայտնել, որ Հայաստանից Հնդկաստանի զենքը կարող է հասնել Իրան, քանի որ Հայաստանն ինքը զենքի հրատապ կարիք ունի, հատկապես հաշվի առնելով Ռուսաստանից պայմանագրերով մատակարարումների ձախողումը, բացի դա Իրանն ունի հնդկական զենքի նման իր զենքը։
Մելքոնյանը հոդվածից մեկ այլ հատված է մեջբերել. «2023 թվականի օգոստոս-սեպտեմբերին ռուսական Իլ-76-երը թռիչքներ են իրականացրել դեպի Հայաստան։ Իրանական «Iran Air Cargo» ավիաընկերության թռիչքներ են եղել։ 2020 թվականին Հայաստանի պաշտպանության նախարարությունը ճանաչել է Իրանից Ռուսաստան զենքի փոխանցումը»։
Նրա կարծիքով այստեղ խառնվել են իրար հետ կապ չունեցող բազմաթիվ իրադարձություններ, իսկ Հայաստանի պաշտպանության նախարարության նման հայտարարություն ընդհանրապես անհնար է գտնել։
Նա նաև մեկնաբանել է այն թեզը, որ Հայաստանն ու Իրանը ռազմական համագործակցության համաձայնագիր են ստորագրել և համատեղ զորավարժություններ են անցկացնում։ «Երևանի և Թեհրանի միջև ստորագրվածը Անկարայի և Բաքվի միջև ստորագրված Շուշայի հռչակագրին նման չէ։ Համատեղ վարժանքներ չեն անցկացվել»,- նշել է փորձագետը։
Մելքոնյանը նաև ընդգծել է այն պարբերաբար հնչող հայտարարությունները, թե Ադրբեջանն Իսրայելի բարեկամն է, և Իսրայելի նավթի 40 %-ը գալիս է Ադրբեջանից, իսկ Իրանը ճնշում է գործադրում Իսրայելի համար բարեկամ Ադրբեջանի վրա։
«Ներկայումս իսրայելական և արևմտյան տեղեկատվական տարածքում քարոզվում է այն դիսկուրսը, որ «Հայաստանը վատ Իրանի և Ռուսաստանի դաշնակիցն է»։ Ուստի այդ հոդվածը ֆեյքերի և կլիշեների մի ամբողջություն է, որը նախատեսված է Հայաստանի շուրջ բացասական ֆոն ստեղծելու համար։ Նման կերպ պատվիրատուները ձգտում են արդարացնել Բաքվի քաղաքականությունը Ստեփանակերտի և Երևանի նկատմամբ»,- եզրափակել է փորձագետը։
Նյութը հրապարակման պատրաստեց Կամո Խաչիկյանը
