Արցախցիներն արգելել են ադրբեջանական «օգնության» մուտքը

Գիշերը բավական թեժ է եղել Ասկերանում՝ Աղդամի ճանապարհին։ Արցախի Ազգային ժողովում տեղի ունեցած նիստից անմիջապես հետո, երեկ առավոտյան Ադրբեջանի «Կարմիր մահիկը» հայտարարեց, թե երկու բեռնատար հումանիտար օգնություն է ուղարկում Լեռնային Ղարաբաղ՝ 40 տոննա ալյուրով և հացամթերքով բեռնված։ Բեռնատարներն այժմ գտնվում են Աղդամում, մոտ հազար արցախցիներ գիշերել են ճանապարհին, թույլ չեն տվել, որպեսզի ադրբեջանական բեռնատարները հատեն ճանապարհը և մտնեն Արցախի տարածք։

Ավելին, 44-օրյա պատերազմի հերոսներից մեկի քույրը՝ Հերմինե Խաչատրյանը, տեսաուղերձով դիմել էր հանրությանը, նշել՝ համաձայն է սոված մնալ, քան թե օգտագործել թուրքի տված ալյուրը։ Այս հայտարարութունից հետո, հարյուրավոր արցախցիներ շտապել են Ասկերան-Աղդամ ճանապարհահատված, որտեղ ավելի վաղ Արցախի անվտանգության և զարգացման ճակատի նախաձեռնությամբ բետոնե արգելապատնեշներ էին դրել։ Առայժմ հայտնի չէ, թե ինչ զարգացումներ կլինեն, թեև Արցախի գործող իշխանությունները պնդում են, թե որևէ պայմանավորվածություն չկա Ադրբեջանի հետ հումանիտար բեռ ստանալու առումով, սակայն հաշվի առնելով նախկինում արված հայտարարությունները, ինչպես նաև ռուսական լրատվամիջոցների արտահոսքերը, կարելի է ենթադրել, որ Արայիկ Հարությունյանը և իր թիմը լավ էլ տեղյակ են եղել նման զարգացումներին, իրենք էլ ամեն ինչ անում են Աղդամի ճանապարհը բացելու ուղղությամբ։ Աղդամի ճանապարհն ամենաառանցքային դրվագն է վերջին շրջանի գործընթացներում, Ադրբեջանն ամեն գնով փորձում է բացել այս ճանապարհը։

Գայանե Մամյան