Ընդդիմադիր թեկնածուների երկխոսությունը խռովել է ՔՊ-ի անդորրը

Երևանի Ավագանու ընտրությունների քարոզարշավի շրջանակներում երեկ Նուբարաշենում տեղի ունեցած իրադարձությունը խռովվել է «Քաղաքացիական պայմանագիր» կուսակցության և նրա կողմնակիցների հոգին։ Նշենք, որ «Ապրելու երկիր» կուսակցությունը երեկ նախընտրական քարոզարշավ էր իրականացնում Նուբարաշեն վարչական շրջանում: Քարոզարշավի ժամանակ փողոցներից մեկում կուսակցության քաղաքապետի թեկնածու Մանե Թանդիլյանը հանդիպել էր նախկին քաղաքապետ Հայկ Մարությանին և իր թիմին: Ինչպես ֆուտբոլիստներն են փոխանակվում մրցակից թիմերի լավ խաղացողների հետ մարզաշապիկներով, այդպես էլ Մարությանն ու Թանդիլյանը փոխանակվեցին բուկլետներով: Հայկ Մարությանը մաղթեց. «Կարևորը՝ արդար, թափանցիկ ընտրություններ լինեն», իսկ Մանե Թանդիլյանը պայմանավորվեց, որ ընտրատեղամասերում միասին պահելու են ձայները ու թույլ չեն տալու, որ կեղծեն:

Ահա հենց այս հանգամանքն էլ հարուցել է «Քաղպայմանագրի» կողմնակիցների բուռն վրդովմունքը, և երեկ, նրանք սոցիալական ցանցերում միահամուռ հիստերիա են բարձրացրել՝ Մանե Թանդիլյանին և Հայկ Մարությանին գամելով անարգանքի սյունին, իսկ հակաքարոզչության հիմնական թեզը, որքան էլ տարօրինակ է հենց գործող իշխանությունների հետ համագործակցությունն է։

Ըստ էության նույնիսկ Նիկոլ Փաշինյանի կողմնակիցներն են հասկանում, որ Փաշինյանի հետ համագործակցությունը բացասական է ազդում մարդկանց վարկանիշի վրա։ Իհարկե, 2018 թվականի իշխանափոխությունից հետո, թե՛ Մանե Թանդիլյանը և, թե՛ Հայկ Մարությանը պաշտոններ են զբաղեցրել գործող իշխանությունների կազմում, սակայն երկուսն էլ լքել են իշխանությունը՝ հրապարակավ հայտնելով իրենց դժգոհությունն իրականացվող քաղաքական կուրսից, ուստի նրանց այսօր այսպիսի մեղադրանք ներկայացնելն առնվազն անհեթեթություն և հիմարություն է, և գաղտնիք չէ, որ հենց այս երկու ուժերն էլ հիմնական քաղաքական մրցակցությունն են ապահովելու գործող վարչախմբի համար և բնականաբար «Քաղպայմանագիրն» իր բոլոր ռեսուրսներն ու քարոզչամիջոցներն ուղղելու է ոչ թե մանր քաղաքական ուժերի, կամ էլ սեփական փսևդոընդդիմադիրների, այլ գլխավոր մրցակիցների դեմ՝ «Ապրելու երկիր» կուսակցության և Երևանի նախկին քաղաքապետ Հայկ Մարությանի։ 

Ռուզան Գաբրիելյան