ՔՊ-ն «ավելի հավասա՞ր» է օրենքի առաջ, քան բոլորը

 Երևանի ավագանու սեպտեմբերի 17-ին նշանակված ընտրություններում Փաշինյանի ՔՊ համամասնական ցուցակն, ինչպես հայտնի է, գլխավորում է Երևանի քաղաքապետի տեղակալ Տիգրան Ավինյանը: Նա անձամբ, ի դեպ, քարոզարշավի մեկնարկի օրը՝ օգոստոսի 23-ին, լրագրողների հետ զրույցում հայտարարեց, որ ինչպես ինքը, այնպես էլ քաղաքապետարանի աշխատակազմի մեծ մասը, որոնցից շատերը նույնպես ավագանու անդամի թեկնածուներ են ու քարոզարշավ են իրականացնում, այդ օրվանից գտնվում են արձակուրդի մեջ: Սա՝ օգոստոսի 23-ին: Իսկ երեկ՝ օգոստոսի 28-ին, Տիգրան Ավինյանը, որպես Երևանի փոխքաղաքապետ, վարում էր... չէ՛, իր նախընտրական շտաբի նիստը չէր վարում, այլ՝ Երևանի քաղաքապետարանի գործակարգավարական խորհրդակցությունը: ՔՊ ցուցակի առաջին համարը Երևանի քաղաքապետարանի վարչությունների, ծառայությունների ղեկավարներին հանձնարարություններ էր տալիս, հաշվետվություններ էր լսում՝ քաղաքային տրանսպորտի ու ծառայությունների աշխատանքի վերաբերյալ: Ավելին, Երևանի ավագանու անդամի թեկնածու Տիգրան Ավինյանը, հիմնվելով քարոզարշավի ժամանակ իրեն բանավոր ասված բողոքի վրա, համապատասխան կառույցի ղեկավարին հանձնարարարեց կարգավորել թիվ այնինչ ավտոբուսային երթուղով ավտոբուսների շարժը: Ու այս ամենը արվում էր օրը ցերեկով, ուղիղ եթերով հեռարձակման և ընդարձակ տեղեկատվական լուսաբանման պայմաններում: Այն, ինչ օգոստոսի 28-ին արեց Տիգրան Ավինյանը, ոչ միայն վարչական ռեսուրսի չարաշահում է ու մրցակցային պայմաններում ընտրապայքարի բոլոր սկզբունքների կոպտագույն ոտնահարում, այլև, կարծում ենք, որպես օրինախախտում, բավարար հիմք է՝ ԿՀԸ-ի կողմից հարցը քննարկելու և համապատասխան որոշում կայացնելու համար: Մասնավորապես, կան հիմքեր ասելու, որ ոտնահարվել են ՀՀ «Ընտրական օրենսգրքի» 19-րդ հոդվածի («Նախընտրական քարոզչության հիմնական սկզբունքները») դրույթները, մասնավորապես, 5-րդ կետի 1 ենթակետը, ինչպես նաև վերոհիշյալ հոդվածի նաև 6-րդ կետի պահանջները: Փաստերն ակնհայտ են: Միամիտ չենք, բայց սպասենք ԿԸՀ հետևություններին..., հետո կանենք մե՛ր հետևությունները: Թե՞ ՔՊ-ն «ավելի հավասար» է օրենքի առաջ, քան բոլորը: