ՔՊ-ում խնդիրների են բախվել քարոզարշավի ընթացքում
ՎԵՐԼՈՒԾՈՒԹՅՈՒՆՆԵՐ
«Քաղաքացիական պայմանագիրն» ու իր քաղաքապետի թեկնածու Տիգրան Ավինյանը քարոզարշավի երեք օրերի ընթացքում արձանագրել են, որ լուրջ խնդիրների են բախվում, իսկ նախապես տրված խոստումները՝ քվե ապահովելու, քարոզչական հանդիպումները տհաճ զարգացումներից ապահովելու, չեն կատարվում։
Մեր աղբյուրի փոխանցմամբ, Տիգրան Ավինյանն ամեն երեկոյան խորհրդակցություն է հրավիրում՝ հասկանալու քարոզարշավի ընթացքը։ ՔՊ-ում առանձին և լավ պատրաստված խումբ է աշխատում՝ քարոզարշավի ընթացքը դիտարկելու ուղղությամբ, և երեկոյան զեկուցում քաղաքապետի թեկնածուին։ Երեք օրվա արդյունքներով արձանագրել են, որ խոստացված բեմադրությունները, քաղաքապետի թեկնածուին համբուրող և օրհնող տատիկները չկան, ՔՊ-ին էլ առանձնապես բարեհամբույր ընդունելություն ցույց չեն տալիս։ Այս փաստը վկայում է, որ քարոզարշավի վրա արվող ծախսերն արդյունավետ չեն կատարվում։ Դժգոհություններ կան ինչպես տեղական շտաբներից, այնպես էլ թաղային կրիմինալից, որն էլ պետք է համակարգեր այս բեմադրությունները։
ՔՊ-ին թվում էր, թե հատկապես Էրեբունի վարչական շրջանում, որտեղ Ավինյանին քվեներ խոստացել է անձամբ Մհեր Սեդրակյանը, քարոզարշավը հատկապես հանդարտ է անցնելու, սակայն Ավինյանն անձամբ շատ դժգոհ է եղել ընթացքից։ Պարզել են նաև, որ թաղային հեղինակություններն էլ առանձնապես հեղինակություն չեն վայելում։ Սա, ի դեպ, ՔՊ-ում համարում են «հեղափոխության» հետևանքը։ 2018-ին իբր ազատագրված զանգվածները կարծում են, որ այլևս ազատ են իրենց կարծիքն ուղիղ իշխանության դեմքին ասելու համար։ Նաև համարում են, որ Փաշինյանը խաբել է իրենց, իսկ բռնագանձված գույքից իրենց փայ չեն հանել։
2018-ից հետո երկրում լավ սկսել են ապրել միայն «հեղափոխականները», իսկ նրանց ընտրազանգվածը հիասթափված է։ Մեր աղբյուրի փոխանցմամբ, այժմ որոշվել է մի քանի օր էլ շարունակել քարոզարշավը, ապա, ընթացքից դատելով, որոշել՝ միացնու՞մ են ընտրակաշառք բաժանելու մեխանիզմը, թե՞ ոչ։
Նարե Անտոնյան
