«Արցախի հարցի լուծումը Երևանում է՝ իշխանափոխության միջոցով». Մանե Թանդիլյան

Արցախի հարցի լուծումը Երևանում է՝ իշխանափոխության միջոցով, այդ մասին ֆեյսբուքյան իր էջում նշել է «Ապրելու երկիր» կուսակցության համանախագահ, Երևանի ավագանու ընտրություններում կուսակցության քաղաքապետի թեկնածու Մանե Թանդիլյանը։ Անդրադառնալով ՄԱԿ անվտանգության խորհրդում կայացած քննարկումներին՝ Մանե Թանդիլյանը նշել է, թե՝ «Որևէ մեկը մեզ համար ոչինչ չի արել և չի անելու, եթե ինքներս չդառնանք մեր խնդիրների կարգավորման առաջամարտիկը։ Եթե Նիկոլ Փաշինյանը հայտարարում է, որ Արցախը ճանաչում է Ադրբեջանի կազմում, ապա ՄԱԿ-ի, կամ ցանկացած միջազգային կառույցի կողմից Արցախում կատարվող ցանկացած հարցի քննարկում, դիտարկվում է, որպես Ադրբեջանի ներքին հարցի քննարկում»,-նշել Է Թանդիլյանը և հավելել. «Հետևաբար նույնիսկ կարիք էլ չկա անդրադառնալու արտգործնախարարի հայտարարության բովանդակությանը և որակին, Ադրբեջանի կեղծ թեզերի նկատմամբ հակադարձումներին»։

Ըստ Երևանի քաղաքապետի թեկնածուի՝ միայն ամբողջական իշխանափոխությունից և «Հզոր Հայաստան, Ազատ Արցախ» արտաքին քաղաքականության օրակարգով, ժողովրդի վստահությամբ ընտրված իշխանությունն ի զորու է լինելու զբաղվել մեր խնդիրների կարգավորմամբ։ «Ապրելու երկիր» կուսակցության այս դիրքորոշումը չափազանց կարևոր է՝ հաշվի առնելով ՄԱԿ անվտանգության խորհրդում Հայաստանի ձախողված ներկայությունը։

Մինչ հանրությունը քննարկում է, թե ինչպես Հայաստանը չկարողացավ տեղ հասցնել Արցախի համար կարևորագույն խնդիրների քաղաքական և հումանիտար հարցերի լուծման իր տեսլականը, «Ապրելու երկիրն» անդրադառնում է, որ հարցի լուծումը միայն մեկ ձևով է հնարավոր Երևանում, այն էլ իշխանափոխության միջոցով, ցանկացած այլ տարբերակ փակուղի է տանելու հանրությանը։ Մինչ մենք փորձում ենք տրամաբանության և ողջամտության հատիկ գտնել գործող վարչախմբի գործողություններում, նրանք շարունակում են իրենց դավաճանական քաղաքականությունը և հենց սա էլ նկատի ունի «Ապրելու երկիր» կուսակցության համանախագահը։

Անահիտ Սաֆարյան