Ի՞նչ է առաջարկում Ռուսաստանը. Արցախում դեմ են Աղդամի ճանապարհին

Ռուսական «Կոմերսանտը», վկայակոչելով ռուսական պետական համակարգի անանուն աղբյուրին, հայտնում է, թե Ռուսաստանն առաջարկել է բացել Աղդամի և Լաչինի ճանապարհները, որին սկզբում համաձայն էին ադրբեջանական և ղարաբաղյան կողմերը։

Տարածաշրջանային իրավիճակին ծանոթ պաշտոնյայի խոսքով՝ Ռուսաստանի արտգործնախարար Սերգեյ Լավրովն առաջարկել էր սկզբում բացել Աղդամի ճանապարհը, այնտեղով Կարմիր խաչի մեքենաները Լեռնային Ղարաբաղ կմատակարարեին ինչ անհրաժեշտ է, իսկ մեկ օր անց, ըստ Մոսկվայի առաջարկի, կբացվեր Լաչինի ճանապարհը։ «Նման տարբերակը բարձր աստիճանի պատրաստավածության էր բերված»,- ասել է «Կոմերսանտի» զրուցակիցը։ Բայց, նրա խոսքով, Ղարաբաղի հայերը պայման են դրել, որ Լաչինը բացվի ոչ թե մեկ օր հետո, այլ միաժամանակ, իսկ հետո պահանջել են, որ Աղդամով ադրբեջանական ապրանքներ չմատակարարվեն։

Այնուհետ տեղի ունեցավ Վագիֆ Խաչատրյանի հետ կապված սկանդալը և փոխզիջումը տեղի չունեցավ։ «Կոմերսանտի» զրուցակցի փոխանցմամբ, Մոսկվայում իրավիճակը շատ լուրջ են գնահատում և համարում են, որ Բաքուն հակված չէ զիջումների։ «Իրավիճակն ինչ-որ կերպ հանդարտեցնելու բոլոր փորձերը, որ ձեռնարկում ենք մենք, արևմտյան, միջազգային կազմակերպությունները, ոչ մի բանի չեն հանգեցնում. Բաքուն հետ չի գնում», - ասել է պաշտոնյան, հավելով, որ Ղարաբաղի իշխանությունները ևս համառում են, մասնավորպես, մերժել են Աղդամի ճանապարհն օգտագործելու տարբերակը։

Ըստ Ռուսաստանի պաշտոնյայի՝ ամեն դեպքում Աղդամի ճանապարհը բացվելու է։ Հայաստանի իշխանություններն առայժմ հարկ չեն համարել արձագանքել այս տեղեկությանը, Արցախից էլ նշում են, թե Լաչինի անխափան աշխատանքից հետո միայն կարող են քննարկել այլընտրանքային տարբերակներ։ Ստեփանակերտը նշում է, թե գոյություն ունի եռակողմ հայտարարություն, որտեղ սևով սպիտակի վրա ամրագրված է Լաչինի միջանցքի բաց լինելու հանգամանքը, իսկ Աղդամի միջանցքի մասին ոչ մի խոսք չկա։ Ադրբեջանը շրջափակման վերջին շրջանում, երբ տոտալ արգելափակել է Արցախը, անընդհատ առաջ է մղում Աղդամի ճանապարհով բեռներ տեղափոխելու անհրաժեշտության մասին։

Աղդամով որևէ բեռի փոխանցումը վտանգում է Արցախի ինքնիշխանությունը, Արցախին կախվածության մեջ դնում Ադրբեջանի կամքից։ Հենց սա է, որ գիտակցում են արցախցիները։ «Արցախի անվտանգության և զարգացման ճակատը» շաբաթներ առաջ արգելափակոց էր դրել Աղդամի ճանապարհին՝ ցույց տալով, որ մտադիր չեն որևէ կերպ ընկրկել։ 

Կարեն Բաբայան