Սերգեյ Սմբատյանի դեմ դաժան վերաբերմունքը ցնցել է անվանի մարդկանց

Հանրությանը ծանոթ և հարգանքի արժանի բազմաթիվ մարդիկ այս օրերին պարզապես ցնցված են՝ պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի կալանքի կապակցությամբ։ Սմբատյանը, ինչպես նաև նրա հայրը՝ դեսպան Արմեն Սմբատյանը, ոմն գործարար Արման Պետրոսյանը, կալանավորված են և նրանց մեղադրում են խարդախության մեջ։

Ըստ էության, նույնիսկ քննչական կոմիտեի տարածած հաղորդագրությունից պարզ է դառնում, որ, եթե, ինչ-որ մեկն էլ մեղավոր է այդ խարդախության մեջ, ապա դա բնավ էլ Սերգեյ Սմբատյանը չէ և նա, ըստ գործի նյութերի, պարզապես ստորագրել է իր հոր հրամցրած փաստաթղթերը, ուստի և նրա նկատմամբ նման խիստ և չափազանց ծանր խափանման միջոց ընտրելն ընդամենը վրեժխնդրության դրսևորում է գործող իշխանությունների կողմից։

Բնականաբար, մի խումբ անվանի բժիշկներ Սերգեյ Սմբատյանի խափանման միջոցը փոխելու խնդրանքով և միջնորդությամբ դիմել են գլխավոր դատախազ Աննա Վարդապետյանին։ Մեկ այլ դիմում էլ ներկայացրել են Հայաստանի առաջատար մարզիկները, ինչպես օլիմպիական չեմպիոններ Արթուր Ալեքսանյանն ու Արմեն Նազարյանը, գրոսմաստեր Տիգրան Պետրոսյանը, աշխարհի իննակի չեմպիոն, բռնցկամարտիկ Վիկ Դարչինյանը, Արթուր Աբրահամը, Ամոյան եղբայրները և այլ հայտնի մարզիկներ։

Գործող իշխանությունները վաղուց ապացուցել են, որ իրենց հակառակորդների դեմ պայքարում, կամ էլ հանրային հնչեղություն ունեցած գործերով շոու ապահովելու նպատակով չեն խորշի ոչնչի առջև, այդ թվում նաև աշխարհահռչակ անձանց կալանավորելու։ Ամենևին չցանկանալով խախտել որևէ մեկի անմեղության կանխավարկածը, չենք ուզում նշել, թե Սմբատյաններն այս գործով անմեղ են։ Թերևս, սակայն, բոլոր գործով մասնագետները նշում են, որ այս դեպքում, ինչպես նաև բազմաթիվ այլ դեպքերում, հնարավոր էր խափանման այլ, կալանքի հետ կապ չունեցող միջոցներ ընտրել, նույնիսկ տնային կալանք, կամ գրավ կիրառել, այդ պարագայում, օրինակ, Սերգեյ Սմբատյանը ստիպված չէր լինի իր ազատ ժամանակն անցկացնելու ճաղերի ետևում, այլ կզբաղվեր իր սիրած աշխատանքով՝ հետագայում Հայաստանին նորանոր հաջողություններ բերելով։ Իշխանությունների վարքը ոչ այլ ինչ է, քան պարզ վրեժխնդրություն և փնթի շոու։

Անահիտ Մախսուդյան