Թուրքիան նոր նախապայման է դնում՝ բացել «Զանգեզուրի միջանցքը»

Թուրքիան շարունակում է նախապայմաններ ներկայացնել Հայաստանին հարաբերությունները կարգավորելու համար։ Մինչ փաշինյանական վարչախումբն ու հայ–թուրքական հարաբերություններում նրա բանագնաց Ռուբեն Ռուբինյանը հանրությանը փորձում են ապակողմնորոշել, թե իբր հայ-թուրքական կողմնորոշման գործընթացում որևէ նախապայման չկա, հերթական նախապայմանը երեկ բարձրաձայնել է Թուրքիայի նախագահ Ռեջեփ Թայիբ Էրդողանը։

Ադրբեջանի արտգործնախարար Ջեյհուն Բայրամովի հետ հանդիպմանն Էրդողանը քննարկել է Հայաստանի հետ հարաբերությունների կարգավորման գործընթացը, նշել, որ կարգավորման գործընթացի համար կարևոր է Զանգեզուրի միջանցքի արագ բացումը և Ադրբեջանի հետ համապարփակ խաղաղ համաձայնագրի շուտափույթ իրականացումը։

Զանգեզուրի միջանցքին անդրադարձել է նաև Թուրքիայի արտգործնախարար Հաքան Ֆիդանը, Բայրամովի հետ հանդիպումից հետո կայացած մամուլի ասուլիսում, նշել է, թե Հայաստանը պետք է բացի Զանգեզուրի միջանցքը։ «Տարածաշրջանային անդորրի և կայունության տանող ճանապարհն անցնում է համապարփակ խաղաղության պայմանագիր ստորագրելու միջով, դրա համար էլ Զանգեզուրի կապուղղու բացումը մեծ կարևորություն ունի, սա տարածաշրջանի բոլոր երկրների օգտին մի զարգացում է լինելու», -հայտարարել է Ֆիդանը։

Իսկ Բայրամովը նշել է, թե Հայաստանը խոչընդոտում է տարածաշրջանում կայունության հաստատմանը, շարունակում է իր զինված ուժերի ստորաբաժանումները պահել Ադրբեջանի տարածքում, խոչընդոտում է Զանգեզուրի միջանցքի բացմանը, Ղարաբաղում ապրող հայերի իրավունքների պաշտպանության պատրվակով շարունակում է միջամտել Ադրբեջանի ներքին գործերին և այլն։

Ըստ էության, Ադրբեջանի և Թուրքիայի համատեղ դիրքորոշումները և այսօր դրա մասին բարձրաձայնումը վկայում են, որ թուրք-ադրբեջանական տանդեմը պարզապես սպառնում է Հայաստանին՝ Զանգեզուրի միջանցք չտալու դեպքում նոր ռազմական գործողություններով, ինչը, թերևս, ներկա իրավիճակում բավական իրատեսական զարգացում է համարվում։ Թե ի՞նչ է անում Հայաստանի գործող իշխանությունը՝ Նիկոլ Փաշինյանի գլխավորությամբ, նույնիսկ կարելի է չասել՝ ակնհայտ է։

Ալինա Ալավերդյան