«Դա սովորական, դասագրքային ֆաշիզմ էր». Մամիջանյանը՝ Փաշինյանի կողմից արցախցիներին թիրախավորելու մասին

Ես ուզում եմ խոսել Նիկոլ Փաշինյանի կողմից երեկվա տարածած ատելության խոսքի մասին. դա սովորական, դասագրքային  ֆաշիզմ էր: Այս մասին, այսօր՝ հուլիսի 26-ին, մամուլի ասուլիսի ժամանակ նշեց ԱԺ «Պատիվ ունեմ» խմբակցության ղեկավար, ՀՀԿ անդամ Հայկ Մամիջանյանը:

«Փաշինյանն ատում է հային, որովհետեւ բոլորիս համար կապ չունի, թե մեր հայրենիքի որ հատվածում է ծնվել հայը, երբեք նման թիրախավորումներ չեն արվում: Ես երբեք տավուշեցիներին չեմ թիրախավորում: Ես ասում եմ՝ մի տավուշեցի կապիտուլյանտ դավաճան է՝ Նիկոլ Փաշինյանը: Ինքն անում է հակառակը:

Կապված նրա հետ՝ Ղարաբաղում հերոսներ են թեոչ. Ցանկացած սահմանապահ բնակավայրում հերոսներ են: Ցանկացած մարդ, որ գյուլլի բերան է ապրում, հերոս է, որովհետեւ իր մնալու արդյունքում մեր երկիրն ավելի անվտանգ է: Փաշինյանը եթե այսպես շարունակի, երեւանցիներն էլ հերոս կդառնան, որովհետեւ Երեւանն էլ կդառնա սահմանապահ:

Ես չեմ էլ փաստեր ներկայացնելու, թե մեր հայրենիքի որ հատվածի ներկայացուցիչներն ինչ ներգրավվածություն են ունեցել Ղարաբաղյան պատերազմների ժամանակ ու քանի զոհ են տվել: 44-օրյա պատերազմին զոհվել է 5 հազար հայ: Ոչ մեկը մտքով, բացի Փաշինյանից չի անցնում բաժանել զոհված հայերին, թե որտեղ են ծնվել»,-ասաց Մամիջանյանը:

Նա նկատեց, որ այդ ատելության խոսքի արդյունք է այն, ինչ այսօր տեղի է ունեցել անհետ կորածների ծնողների ակցիայի ժամանակ. «Նման բան երբեք չէր եղել, որ հայը, որն իր զավակի ճակատագրով է հետաքրքրվում, նրան այդպիսի բաներ ասեին»;

Հիշեցնենք, որ այդ ակցիայի ժամանակ տարեց մի քաղաքացի անհետ կորածի ծնողին հորդորում էր Բաքվում գնալ ակցիա անել: