Փաշինյանն անձամբ է սկսել Երևանի ընտրությունների քարոզարշավը

Երևանի ավագանու ընտրություններին ընդառաջ արդեն ուրվագծվում են, թե ինչ ճանապարհով է գործող իշխանություններն իրականացնելու իրենց քարոզարշավը։ Դրա «մեկնարկն» երեկ տվել է վարչապետի տիկին Աննա Հակոբյանը։ Ցուցահանդես այցելելուց հետո, հրապարակելով տեսանյութ, թե ինչպես է Նիկոլ Փաշինյանը բարձրանում Երևանի ավտոբուսներից մեկը և կարծես պատահաբար նաև գովում, թե որքան սառն ու հարմար են այդ ավտոբուսները։ Այն, որ Փաշինյանն ավտոբուս է բարձրացել ՊՊԾ աշխատակիցների ուղեկցությամբ, իսկ ավտոբուսում նստած մարդիկ առանձնապես խանդավառված չէին վարչապետի պաշտոնը զբաղեցնող անձին տեսնելու համար, անզեն աչքով նկատելի է նաև վարչապետի տիկնոջ տարածած տեսանյութից։

Ըստ երևույթին Փաշինյանն այնքան էլ չի վստահում քարոզարշավը Տիգրան Ավինյանին և հենց իր ձեռքով էլ փորձում է իրականացնել՝ դրա համար օգտագործելով նաև սեփական կնոջը։ Այս երկուսը լուրջ խնդիրներ ունեն Ավինյանի հետ, սակայն գիտակցում են, որ Երևանի ավագանու ընտրություններում պարտությունը կոնկրետ իրենց համար իշխանության կորուստ և այլ վտանգներ է պարունակում, ուստի և փորձում են հենց իրենց ձեռքով իրականացնել քարոզարշավը։ Այդ դեպքում էլ Նիկոլ Փաշինյանը հնարավորություն կունենա իր կողմնակիցներին հայտարարելու, թե հենց ինքն է եղել Երևանի ավագանու ընտրություններում հիմնական հաղթողն, այլ ոչ՝ Տիգրան Ավինյանն իր թիմով։

Այդ կապակցությամբ էլ Փաշինյանը նախընտրական շտաբի պետ նշանակել տվեց իր մերձավոր զինակիցներից մեկին, որի միջոցով էլ իրականացվելու է քարոզարշավն ու ընտրությունների համակարգումը։ Իշխանությունը մտածում է վարչական ռեսուրսի և այլ միջոցներով հասնել գոնե առնվազն 30 %-ի, իսկ ըմդդիմության ձայները փոշիացնելու համար մեկ տասնյակից ավելի կուսակցություններ և դաշինքներ է ստեղծում և պարտադրում մասնակցել ընտրություններին, հանդես գալ հիմնական արմատական ընդդիմադիր միավորներին սևացնելու գործով։ Փաշինյանը փորձում է իրականացնել 2021 թվականին արդեն մեկ անգամ աշխատած մեթոդն, երբ բազմաթիվ ընտրությունների միջոցով կարողացավ փոշիացնել ընդդիմադիր քաղաքական ուժերի ձայները։

Անահիտ Գաբրիելյան