Ավինյանի և ՔՊ-ի հարաբերությունները կրկին սրվել են

Երևանի քաղաքապետի ավագանու ընտրություններում «Քաղաքացիական պայմանագիրը» մասնակցելու է միայնակ։ Տևական ժամանակ լուրեր էին շրջանառվում, որ իշխանությունը կարող է գնալ որևէ դաշինքով, այլ անվանումով, որպեսզի կարողանան ձայներ հավաքել, սակայն ի վերջո ՔՊ-ն որոշել է գնալ միայնակ, հենց «Քաղաքացիական պայմանագիր» անվանումով, այս կերպ նաև փորձում են վնասել Տիգրան Ավինյանին, ով էլ դաշինքով և նոր անվանումով մասնակցելու կողմնակիցն էր։

Ի դեպ, օրեր առաջ Ավինյանին «բերման» են ենթարկել Ազգային ժողով։ Բազմաթիվ, հատկապես սուր հարցեր տվել։ ՔՊ կարկառուն դեմքերին մտահոգում է, որ Տիգրան Ավինյանն իրենց առանձնապես բանատեղ չի դնում, հնարավորության դեպքում էլ փորձում է առանձնանալ թե՛ նրանցից և թե՛ Նիկոլ Փաշինյանից, ուստի և հանդիպումը տևել է բավականին երկար՝ 3 ժամից ավելի և չափազանց սուր։

Այդ հանդիպմանը պատգամավոր գործարար Խաչատուր Սուքիասյանը պարզապես կասկածի տակ է դրել, որ Տիգրան Ավինյանն ընդհանրապես քաղաքի զարգացման ծրագիր ունի, հարցրել, թե Երևանի ինտելեկտուալ հատվածի համար ինչ առաջարկներ կարող է անել։ Ավինյանն, ի դեպ, չափազանց կոշտ պատասխան է տվել Խաչատուր Սուքիասյանին, հայտարարել, թե արդյո՞ք «Քաղաքացիական պայմանագրում» որևէ մեկը կարող է երաշխիք ունենալ, որ Խաչատուր Սուքիասյանն ու իր հարակից կառույցներն աշխատելու են կուսակցության, այլ ոչ, օրինակ, Վիկտոր Մնացականյանի օգտին։ Ասում են, որ այս արձագանքից հետո Խաչատուր Սուքիասյանն ընդհանրապես լռել է, իսկ այդ դրվագը վկայում է, որ Ավինյանի և գործարար պատգամավորի հարաբերություններն ավելի են սրվելու։

Ի դեպ սրվել են նաև Տիգրան Ավինյանի և Նիկոլ Փաշինյանի հարաբերությունները։ Ավինյանը մի քանի շրջանակների մոտ հայտարարել է, թե ամեն ինչ անելու է, որպեսզի Երևանում Նիկոլ Փաշինյանից ավելի շատ ձայն ստանա։ Հիշեցնենք, որ արտահերթ ընտրություններում Նիկոլ Փաշինյանի գլխավորած «Քաղպայմանագիրը» 41 %-ից մի փոքր ավելի ձայն էր ստացել, և այժմ Ավինյանն ամեն ինչ անելու է, որ գերազանցի այդ ցուցանիշն, այդ կերպ ինչ-ինչ ապացուցելիքներ ունի թե՛ Նիկոլ Փաշինյանին և թե՛ «Քաղպայմանագրին»։

Այս խոսակցությունները հասել են Նիկոլ Փաշինյանի և նրա կնոջ ականջին, իսկ այդ երկուսը չափազանց ծանր են տանում, երբ իրենց կուսակիցների հավակնությունները գերազանցում են իրենց։ Փաշինյանը տանել չի կարողանում, որ իր կողքին իրենից ավելի պատրաստված, խելացի և կարողունակ ուժ լինի, ուստի և փորձում է ամեն ինչ անել, որպեսզի Ավինյանը չկարողանա հավաքել այդ 40 %-ից ավելին, ինչը թերևս առանց Փաշինյանի նեղացածության էլ չափազանց բարդ է լինելու Ավինյանի համար։

Երևանը մշտապես ընդդիմադիր է եղել, իսկ այժմ Տիգրան Ավինյանի վարկանիշը չափազանց ցածր է, նույնիսկ վարչական ռեսուրսի, նախկինների և կրիմինալի ներգրավմամբ նա դժվար թե կարողանա հաղթել Երևանի ընտրություններում։ 

Աշոտ Խաչիկյան