Միրզոյանն ու Բայրամովը երեք օր փակված կմնան Վաշինգտոնում

Հայաստանի ԱԳ նախարար Արարատ Միրզոյանն աշխատանքային այցով մեկնել է Վաշինգտոն, որտեղ այսօրվանից մեկնարկելու է Հայաստանի և Ադրբեջանի միջև հարաբերությունների կարգավորման մասին պայմանագրի շուրջ քննարկումների հերթական փուլը։

Վաշինգտոն է մեկնել նաև Ադրբեջանի արտգործնախարար Ջեյհուն Բայրամովը։ Արտգործնախարարի նախորդ հանդիպումը տեղի է ունեցել մայիսի 1-ից 4-ը, գրեթե 4 օր։ Ադրբեջանական լրատվամիջոցների փոխանացմամբ այս անգամ հանդիպումները տևելու են 3 օր և առարկայական արդյունք պետք է ունենան։ Ամերիկյան կողմը մտադիր է բանակցող կողմերին փակել մի սենյակում օրեր շարունակ, մինչև նրանք վերջնականապես համաձայնեցնեն պայմանագրի շուրջ իրենց մոտեցումները։

Հանդիպումը պետք է կայանար հունիսի 12-ին, սակայն ադրբեջանական կողմի խնդրանքով հետաձգվել էր։ Ըստ երևույթին Վաշինգտոնում առանձնապես հակված չէին ձգձգումը երկար թողնել և երկու շաբաթ անց պարզապես պարտադրել են, թե՛ Հայաստանին և թե՛ Ադրբեջանին ներկայանալ Վաշինգտոն։

Ամերիկացիներն այս կերպ ցանկանում են հնարավորինս մեծացնել իրենց ազդեցությունը տարածաշրջանում և հասնել Ռուսաստանի լիակատար դուրս մղմանը Հարավ-կովկասյան տարածաշրջանից։ Այն, որ այս գործողություններն իրականացվում են առաջին հերթին Ռուսաստանի դեմ, ռուսական կողմը չի թաքցնում։ Միջազգային վերլուծաբանները հստակ փաստում են, որ սա ուղղված է Ռուսատանի ներկայության դեմ։ Ամերիկյան կողմին բնավ էլ չի հուզում հայկական գյուղերի և բուն Արցախի բնակչության ճակատագիրը, իրենց պետք է ամեն գնով Ռուսաստանին հեռացնել։

Մի քանի անգամ պաշտոնական Մոսկվան ահազանգել է այս վտագների մասին, սակայն թե՛ Հայաստանի գործող վարչախումբը և թե՛ Ալիևն առանձնապես ցանկություն չունեին ենթարկվելու Մոսկվայի պահանջներին։ Եթե Ալիևի դեպքում հասկանալի է, նա ցանկացած իրավիճակում փորձում է հնարավորինս քաղել իր շահեկան դիրքից, ապա Հայաստանի գործող իշխանությունների պարագայում սա ոչ այլ ինչ է, քան պարզապես դավաճանություն:

Մհեր Օհանջանյան