Ադրբեջանը պատրաստվում է նոր ռազմական էսկալացիայի, իսկ Ալիևը ծաղրում է Փաշինյանին

 Հայաստանի գործող իշխանությունները փորձում էին ԵԽԽՎ բանաձևը ներկայացնել որպես դիվանագիտական խոշոր ձեռքբերում։ Եվրոպայի խորհրդի խորհրդարանական վեհաժողովը կոչ է արել Ադրբեջանին անհապաղ բացել Լաչինի միջանցքը և ապահովել բեռների ու մարդկանց տարանցումը։ Ադրբեջանը, թերևս, բացարձակ մտադիր չէ կատարել ոչ միայն այս, այլ մյուս կոչերը, նույնիսկ ՌԴ ԱԳՆ-ն երեկ ուշացած կոչ է արել Լաչինի միջանցքի ապաշրջափակման մասին։

Ավելին, Հաքարիի կամրջի վրա դրված անցակետն Ադրբեջանը վերածել է զրահատեխնիկայով, ինժեներական արգելապատնեշներով և զինված անձնակազմով համալրված ռազմական հենակետի։ Ըստ Արցախի արտգործնախարարության՝ սա ապացուցում է, որ ադրբեջանական կողմի բոլոր գործողությունները կրում են կանխամտածված և ծրագրային բնույթ և նպատակ ունեն հայերի կյանքն արցախում դարձնել անհնարին։ Ադրբեջանի արտգործնախարար Ջեյհուն Բայրամովը հարցազրույց է տվել «Ռոյթերս» գործակալությանը և մերժել է Հայաստանի պահանջը խաղաղության բանակցությունների նոր փուլից առաջ Լեռնային Ղարաբաղում բնակվող շուրջ 120 հազար հայերի համար անվտանգության հատուկ երաշխիքներ տրամադրելու մասին։

Անցած ամիս Նիկոլ Փաշինյանն էր հայտարարել, որ Հայաստանը ճանաչում է Ադրբեջանի մաս, սակայն ցանկանում է Բաքուն երաշխիքներ տա էթնիկ հայ բնակչության համար։ Ըստ Բայրամովի՝ նման երաշխիքն ավելորդ է և նշանակում է միջամտություն Ադրբեջանի ներքին գործերին։

Շատ ավելի հեռուն է գնացել Իլհամ Ալիևը, որը նոր պահանջներ է ներկայացրել Հայաստանի հետ «երկարաժամկետ խաղաղության» հասնելու համար։ Ըստ Ալիևի՝ Հայաստանը պետք է ճանաչի Ադրբեջանի տարածքային ամբողջականությունը, բացի Զանգեզուրի միջանցքը և հայկական զորքերը դուրս բերի Ղարաբաղից։ Ելույթ ունենալով պաշտպանության նախարարության զորամասերից մեկում՝ Ալիևը հիշեցրել է, որ անցած տարվա հոկտեմբերին Հայաստանը պաշտոնապես ճանաչել է Ադրբեջանի տարածքային ամբողջականությունն, իսկ անցած ամիս նշել է այդ տարածքի պարամետրերը, սակայն այդ հայտարարություները պետք է լինեն թղթի վրա և Հայաստանը ստորագրի դրանք։ Ավելին, նա հայտարարել է, թե Ադրբեջանը շարունակում է զենքի գնումները, վերջին 2,5 տարում ուժեղացրել է իր բանակը։ «Եթե Հայաստանը և նրա հետևում կանգնած օտարերկրյա ազգկանները չեն հասկանում այս բոլոր գործոնները, ապա մեղքն իրենցն է»,- ասել է Ալիևը, շարունակել սպառնալ և ծաղրել փաշինյանական իշխանությանը։

Ըստ էության, Ադրբեջանը պատրաստվում է նոր ռազմական էսկալացիայի, իսկ փոխարենը, Հայաստանի գործող իշխանություններն առաջ են մղում իրենց ձախողված խաղաղության օրակարգը՝ նոր աղետների հանգեցնելով հայ ժողովրդին։

Վարդինե Ղուլյան