«Հպարտ» քաղաքացուն խոշտանգում են քննչական մարմիններում. Հայաստանում իրավունք գոյություն չունի

«Հայ ազգային կոնգրեսի» նախկին ակտիվիստ Տիգրան Առաքելյանի հետ տեղի ունեցած դեպքը վկայում է, որ Հայաստանի իրավապահ համակարգը բացարձակապես որևէ փոփոխություն չի կրել, ընդհակառակը Նիկոլ Փաշինյանի օրոք ավելի շատ է վերածվել խոշտանգող և իրավունքի հետ կապ չունեցող համակարգերի։ Ավելին այս դեպքը վկայում է, որ Հայաստանի ուժային կառույցների մեջ կա լրջագույն խնդիր, որը կարող է ցնցումների հանգեցնել երկիրը։

Հիշեցնենք՝ ակտիվիստին օրեր առաջ տեղափոխել էին քննչական կոմիտե։ Ինքն՝ Առաքելյանն, որը չի հայտնում, թե ինչի համար են իրեն բերման ենթարկել, մի քանի անգամ ֆեյսբուքով տեսանյութեր է տարածել և նշել, որ ՔԿ նախագահ Արգիշտի Քարամյանն ու այլ քննիչներ իրեն ժամեր շարունակ խոշտանգել են, էլեկտրահարել, սպառնալիքներ տեղացել իր և ընտանիքի հասցեին, պնդել, թե իրենից ինչ-որ ցուցմունքներ են փորձում կորզել Ազգային անվտանգության ծառայության պետի, Գլխավոր դատախազի դեմ։

Որ Հայաստանի ուժային և իրավապահ կառույցներն իրար հետ խնդիրներ ունեն, որևէ մեկի մոտ կասկած չէր հարուցում։ Եթե նախկին իշխանությունների օրոք այդ խնդիրներն ու հակասությունները լուծվում էին գերազանցապես երկրի ղեկավարության սենյակում՝ իրար հաշտեցնելով կամ կարգավորելով, ապա Փաշինանի օրոք բոլոր այդ խնդիրները դարձել են հրապարակային քննարկման առարկա, իսկ փաշինյանական պաշտոնյաները չեն խորշում ակնհայտ ցույց տալ այդ հակասություններն, իրար վրա կոմպրոմատներ տարածել և իրար հարվածել։

Թե ինչ ճակատագիր կունենա «Հայ ազգային կոնգրեսի» ակտիվիստի գործը, բարդ է ասել։ Ազգային անվտանգության ծառայությունը, համենայնդեպս, քրեական գործ է հարուցել և քննում է, առավել ևս, եթե շոշափվում է ԱԱԾ պետի անունը, բնականաբար այդ անվտանգության ծառայությունն առավելապես մանրազնին քննություն է իրականացնելու, իսկ կոնկրետ այս մեկ դեպքն, երբ հայտնի ակտիվիստի հետ նման կերպ են վարվում վկայում է, որ Քննչական կոմիտեի և մյուս ուժայինների ապօրինություններից ապահովագրված չէ Հայաստանի Հանրապետության և ոչ մի քաղաքացի։

Իրինա Ալեքսանյան