Ադրբեջանին զսպելու միակ տարբերակը

Եթե միջազգային հանրությունն իսկապես ցանկանում է կասեցնել Արցախում հայերի էթնիկ զտման քաղաքականությունը, պետք է պատժամիջոցներ սահմանի Ադրբեջանի իշխող վարչակազմի նկատմամբ։ Սա Ադրբեջանին զսպելու միակ իրական տարբերակն է: Այս արձանագրումն արել է նախկին պետնախարար Ռուբեն Վարդանյանի գլխավորած «Արցախի անվտանգության և զարգացման ճակատ» հանրային շարժումը՝ մեկնաբանելով ԵԽԽՎ բանաձևը «Լաչինի միջանցքով ազատ, անվտանգ մուտքի ապահովման» վերաբերյալ։

Ըստ «Արցախի անվտանգության և զարգացման ճակատ» հանրային շարժման, բանաձևը կոչ է անում Բաքվին անհապաղ կատարել Մարդու իրավունքների եվրոպական դատարանի կողմից 2022 թվականի դեկտեմբերի 21-ին հրապարակված վճիռը և Արդարադատության միջազգային դատարանի որոշումը։ Վեհաժողովը նաև իր անհանգստությունն է հայտնում Ադրբեջանի ղեկավարության կողմից հայերի նկատմամբ կիրառվող թշնամական քաղաքականության վերաբերյալ՝ կոչ անելով Բաքվին քայլեր ձեռնարկել ատելության խոսքի դեմ պայքարելու համար:

«Մինչ ԵԽԽՎ-ում քննարկումներ էին ընթանում բանաձևի շուրջ, Ադրբեջանը բետոնե պատնեշներ էր տեղադրում Արցախը Հայաստանի հետ կապող ճանապարհի երկու կողմերում՝ էլ ավելի խորացնելով հումանիտար ճգնաժամն Արցախում: Այս դրվագը հերթական անգամ ցույց է տալիս, թե ինչպիսի արհամարհական վերաբերմունք ունի Ադրբեջանը միջազգային կոչերի, բանաձևերի ու անգամ դատարանների որոշումների նկատմամբ: Սա փաստում է այն մասին, որ կոչերը, բանաձևերը բավարար չեն Ադրբեջանին զսպելու համար, նման գործելաոճը պետք է հստակ պատժի արժանանա միջազգային մեխանիզմների շրջանակներում»,- նշել են ճակատից։

Նարե Առաքելյան