Բլինքեն-Ֆիդան հանդիպում Լոնդոնում. ի՞նչ է սպասվում Հայաստանին

 Նախօրեին Լոնդոնում ուշագրավ մի հանդիպում է կայացել, իրար հանդիպել են ԱՄՆ պետքարտուղար Էնթոնի Բլինքենը և Թուրքիայի նորանշանակ արտգործնախարար Հաքքան Ֆիդանը։ Սա նրանց առաջին հանդիպումն է եղել և այլ հարցերի թվում երկու երկրների արտաքին գերատեսչութունների ղեկավարներն անդրադարձել են նաև Հայաստանի և Ադրբեջանի միջև հարաբերությունների կարգավորմանը։

Բլինքենն ու Ֆիդանը հունիսի 8-ին ևս մեկ հեռախոսազրույց էին ունեցել և Թուրքիայի ԱԳՆ տարածած հաղորդագրության համաձայն քննարկել էին մի շարք այլ հարցեր՝ այդ թվում նաև Թուրքիայի և Հայաստանի, և Ադրբեջանի և Հայաստանի միջև հարաբերությունների կարգավորման հարցերը։

Միացյալ Նահանգների այս չափազանց ակտիվացման ֆոնին ուշագրավ են երեկ Վաշինգտոնից հնչած տեղեկությունը, որ հաջորդ շաբաթ ԱՄՆ-ում կայանալու է Հայաստանի և Ադրբեջանի արտգործնախարարների հանդիպումը։ Այդ տեղեկությունը նախ հայտնեց ԱՄՆ պետդեպի մամուլի փոխխոսնակ Վեդանտ Պատելը, ապա և կառավարության նիստում՝ վարչապետ Նիկոլ Փաշինյանը։

Հիշեցնենք՝ հանդիպումը պետք է կայանար հունիսի 12-ին, սակայն ադրբեջանական կողմի խնդրանքով, համենայնդեպս այդպես է նշվում պաշտոնական վարկածով, այդ հանդիպումը հետաձգվել էր, իսկ նոր հանդիպումը վստահաբար կայանալու է հունիսի վերջին և տևելու է առնվազն 3 օր։ Նախորդ հանդիպումն ընդհանրապես տևել էր 4 օր։ Միացյալ Նահանագներն ամեն ինչ անում են թե՛ հայ-թուրքական հարաբերությունների և թե՛ հայ-ադրբեջանական հարաբերությունների կարգավորման առումով՝ բացարձակապես հաշվի չառնելով հայկական կողմի շահերը։ Եվ որքան էլ Ռուսաստանը և Հայաստանի ընդդիմադիր շրջանակները զգուշացնում են նման զարգացումների վտանգավորությունը, Նիկոլ Փաշինյանը հաստատապես որոշել է փոխել Հայաստանի արտաքին քաղաքական վեկտորը և այժմ պարում է ոչ միայն Էրդողանի և Ալիևի, այլ նաև ԱՄՆ-ի դուդուկի տակ։

Նազիկ Խաչիկյան