Դեմոգրաֆիան՝ Հայաստանի գլխավոր մարտահրավեր

Հարավային Կովկասի տարածաշրջանում Հայաստանը բնակչության առումով ամենափոքր պետությունն է, և դեմոգրաֆիական խնդիրները ամենասուրը դրված են Հայաստանում, մինչդեռ մեր հակառակորդները հրաշալի հասկանում են դեմոգրաֆիայի կարևորությունը։

Օրերս Բաքու կատարած այցի ընթացքում Թուրքիայի նախագահ Ռեջեփ Թայիփ Էրդողանը հայտարարել էր, որ յուրաքանչյուր ադրբեջանական ընտանիքում պետք է լինի 5 երեխա։ «Առաջ իմ ծրագրում ասում էի, որ պետք է լինի առնվազն 3 երեխա, բայց Ադրբեջանի պարագայում 5 երեխա, չէ՞ որ պետության ուժը բնակչությունն է»,- ասել է Թուրքիայի նախագահը։

Վերջին մարդահամարի տվյալներով՝ Ադրբեջանի բնակչությունը այս տարվա մայիսի 1-ի դրությամբ կազմում է 10 միլիոն 143 հազար մարդ, և Էրդողանի հետ հանդիպմանը Իլհամ Ալիևը հայտարարել է, թե Ադրբեջանի բնակչությունը շուտով կկազմի 11 միլիոն։

Թուրքիայի բնակչությունը վաղուց անցել է 84 միլիոնից, իսկ Հայաստանի բնակչությունը նույնիսկ 3 միլիոն էլ չէ։

Թեև Փաշինյանը իշխանափոխությունից հետո բազմաթիվ առիթներով հայտարարել է, թե պետք է 2050 թվականին Հայաստանի բնակչությունը հասցնել 5 միլիոնի, սակայն 44-օրյա պատերազմի հետևանքով առնվազն նրա այս հայտարարությունն իրականույթան հետ որևէ աղերս ունենալ չի կարող։ Նույնիսկ ՄԱԿ-ի փորձագետներն են նշում, որ 2050 թվականին Հայաստանի բնակչությունն ավելի փոքր է լինելու, քան այժմ։

Թշնամիների մեծ արագությամբ աճելու ֆոնին Հայաստանի բնակչության նվազումը առաջնային մարտահրավեր է մեր երկրի համար, մինչդեռ գործող վարչախումբը հայտարարություններից այն կողմ չի անցնում, իսկ երկրում զարգացման, հզորացման և որպես դրա արդյունք բնակչության թվի աճի համար առաջնահերթ հարկավոր է նախ ազատվել փաշինյանական վարչախմբից, որից հետո միջոցներ ձեռնարկել Հայաստանի բնակչության թիվն ավելացնելու ուղղությամբ։

Մարատ Գրիգորյան