Ի՞նչ է խոսելու Փաշինյանը քննիչ հանձնաժողովում

44-օրյա պատերազմի հանգամանքները հետաքննող հանձնաժողովը երեկ «ավետեց»։ Հունիսի 20-ին Նիկոլ Փաշինյանը կմասնակցի քննիչ հանձնաժողովի աշխատանքին և կպատասխանի պատգամավորների հարցերին։ Շաբաթներ առաջ ԱԺ պաշտպանության և անվտանգության հարցերի հանձնաժողովը դիմել էր Նիկոլ Փաշինյանին և դրական պատասխան ու օրվա հաստատում էր ստացել։

Դեռևս տևական ժամանակ առաջ՝ ապրիլի 18-ին, Նիկոլ Փաշինյանը հայտարարել էր, թե հարցաքննվելու է հանձնաժողովում, սակայն չէր հստակեցրել, թե երբ է տեղի ունենալու իր մասնակցությամբ նիստը։ Ավելին, նշել, որ նիստը հանրային կլինի, որոշակի փաստեր ունի հայտնելու։ Չնայած հարուցված քրեական գործերին՝ պատերազմից հետո ավելի քան երկու տարի անց դեռ պետական դավաճանության դեպքերով ուժի մեջ մտած որևէ դատավճիռ չկա, իսկ քրեական գործեր հարուցվել են բացառապես զինվորականության դեմ, շատերին էլ տևական ժամանակով կալանավորել։

Հունիսի 1-ին Մոլդովայի հայ համայնքի հետ հանդիպման ժամանակ Նիկոլ Փաշինյանը նշել էր, թե, խորհրդակցելով քննիչ հանձնաժողովի նախագահի և պատգամավորների հետ, եկել է այն եզրակացության, որ իր ելույթը պետք է դռնբաց լինի։ «Շատ կարևոր բաներ կան, որոնք դուք պետք է իմանաք, նույն բանակցային գործընթացի մասին 90-ականների բանակցային պրոցեսների մասին էլ եմ խոսելու, որովհետև առանց այդ ամբողջական նկարագիրն իմանալու այսօրվա մասին պատկերացում կազմելը շատ դժվար է լինելու։ Ես հիմա այդ թեմայի վրա եմ կենտրոնացած, փորձում եմ հասկանալ ինչ խոսել և ինչի մասին լռեմ, որ չվնասեմ պետությանը»,- ասել է Փաշինյանը։

Այն, որ Նիկոլ Փաշինյանը կարող է խոսել առանց մտածելու, որ կարող է վնասել պետությանը, թերևս որևէ մեկի մոտ կասկած չի հարուցում։ Բազմիցս նա ապացուցել է, որ սեփական քաղաքական նկրտումներն առաջ մղելու համար պատրաստ է խոսել, բացահայտել ցանկացած գաղտնիք՝ առանց մտածելու դրա հետևանքների մասին։

Ի դեպ օրեր առաջ պաշտպանության նախկին նախարար, անորակ հրթիռների գործով կալանավորված Դավիթ Տոնոյանն էր հույս հայտնել, որ կմասնակցի քննիչ հանձնաժողովի նիստին միայն այն դեպքում, եթե Նիկոլ Փաշինյանը ևս մասնակցի և նիստը լինի հրապարակային։ Ըստ էության Տոնոյանն ինքն էլ որոշակի բացահայտումներ ունի անելու և դա ցանկանում է անել հրապարակային։

Արդյոք իշախնությունը այնքան համարձակություն կունենա, որպեսզի նիտը հրապարակային անի Նիկոլ Փաշինյանի և Դավիթ Տոնոյանի մասնակցությամբ որևէ տեղեկություն այս հարցում դեռևս չկա։ 

Գայանե Անանյան