Վերկուսակցական հռչակված շարժումը ցնցումների մեջ է. ու՞մ ականջներն են երևում
ՎԵՐԼՈՒԾՈՒԹՅՈՒՆՆԵՐ
Տակավին օրեր առաջ ստեղծված, «Մայր Հայաստան» ժողովրդական շարժում» հավակնոտ անունը կրող նախաձեռնությունը հայտարարել էր, թե իրենց նպատակն է երկրում ձևավորել համազգային միասնություն՝ գործող իշխանության մահաբեր ձեռքը բռնելու, թույլ չտալու Արցախի ոչնչացումը, Հայաստանի անվտանգության համակարգի փլուզումը: Նշվում էր, թե շարժումն իր ձևով և բովանդակությամբ վերկուսակցական է: Շարժման նպատակն իշխանության գալը չէ: Առաջնային խնդիրը՝ Հայաստանի, Արցախի և հայ ժողովրդի ազգային-պետական շահերի պաշտպանությունն է՝ գործող վարչախմբի հեռացման միջոցով: Իշխանազրկումից հետո ձևավորված համախոհական կառավարությունը պետք է ոչ ուշ, քան 1 տարում կազմակերպի խորհրդարանի արտահերթ ընտրություն:
Ըստ էության, շարժման նաախձեռնողները փորձում էին ցույց տալ, իբր շարժումը վերկուսակցական և ապոլիտիկ է, բնավ կուսակցականացված չէ։ Սակայն, այն, ըստ էության, համարվում է ԱԺ «Հայաստան» խմբակցության պատգամավոր Անդրանիկ Թևանյանի շարժումը, որը խնդիր ունի ինչ-որ պահի վերածվելու Երևանի ընտրություններում ավագանու ընտրացուցակի։ Մասնակիցների և նախաձեռնողների կազմը նայելիս, ակնհայտ է դառնում, որ «Մայր Հայաստանի» թիկունքում Ռոբերտ Քոչարյանի ականջներն են երևում, իսկ Անդրանիկ Թևանյանի բուռն ակտիվությունն այդ հարցում որևէ կասկած չի թողնում։ Հիմնական զանգվածը, որ կա այդ շարժան մեջ, այս կամ այն կերպ Քոչարյանի հետ կապված մարդիկ են։
Առնվազն բարդ է հանրությանը համոզել շարժման վերկուսակցականության մեջ, և «Մայր Հայաստանում» էլ դա գիտակցում են, վերջին օրերին բուռն քննարկումներ են՝ նախաձեռնության ապակուսակցայնացումը պահպանելու հարցով, և խնդիրն առաջին հերթին վերաբերում է հենց Անդրանիկ Թևանյանին, որի ակտիվությունն ու շարժումն իր տակ քաշելու քայլերն արժեզրկում են վերկուսակցական գաղափարը։ Շատերը պնդում են, որ առանձնապես կուսակցականացված և Քոչարյանի հետ անմիջականորեն կապված անձինք հետ քաշվեն, իսկ շարժումը առաջնորդեն այնպիսի գործիչներ, որոնք հանրության մեջ ընկալելի են, անմիջականորեն Քոչարյանի հովանավորյալները չեն համարվում։ Հակառակ պարագայում, բարդ է լինելու համոզոլ, որ «Մայր Հայաստան» շարժումը «Հայաստան» դաշինքի ֆիլիալը չէ։ Այժմ այդպիսի առանորդների, մշակութային և քաղաքական գործիչների փնտրտուքի մեջ են։
Արմեն Ասատրյան
