Եռակողմ հանդիպումը ձախողվել է Ալիևի պատճառով. Սպառնում է հարվածել Արցախի ՊԲ-ին

Մոսկվայում Հայաստանի վարչապետի, Ռուսաստանի և Ադրբեջանի նախագահների եռակողմ հանդիպումը ձախողվել է Ադրբեջանի նախագահի պատճառով։

Մեր աղբյուրների փոխանցմամբ, հանդիպումը, որ ընդամենը 20 րոպե է տևել, անցել է լարված, իսկ հիմնական թեման եղել է ոչ թե կոմունիկացիաների բացումը, այլ Արցախի Պաշտպանության բանակի զինաթափումը։ Իլհամ Ալիևը պահանջել է Արցախից հանել հայկական զինված ստորաբաժանումները, հայտարարել, թե նույնիսկ Նիկոլ Փաշինյանն է ընդունում, որ Արցախն Ադրբեջան է, ուստի հարկավոր է «իր տարածքից» դուրս բերել Պաշտպանության բանակը։ Ադրբեջանի նախագահը նաև սպառնացել է, որ ՊԲ-ն չհանելու դեպքում իրավունք ունի հարվածել հայկական դիրքերին, ռազմական գործողություններ սկսելու։

Վստահաբար, Ադրբեջանի նախագահն ինքն էլ ամեն ինչ արել է որևէ փաստաթուղթ չստորագրելու համար, իսկ նրան այդ հարցում աջակցել է Նիկոլ Փաշինյանը։ Դեռևս հանդիպումներից առաջ ռուսաստանյան «Կոմերսանտ» պարբերականը տեղեկություն էր հայտնել թե հանդիպումների արդյունքում առնվազն երկու փաստաթուղթ է ստորագրվելու, որոնցից մեկը վերաբերում էր սահմանազատման և սահմանագծման աշխատանքներին, իսկ մյուսը լինելու էր երեք երկրների ղեկավարների հանդիպումը, ընդ որում պարբերականը նշում էր, որ այդ երկու փաստաթղթերն էլ առնվազն համաձայնեցվել են բոլոր երկրների իշխանությունների կողմից և կասկած չէր հարուցում, որ փաստաթղթերը ստորագրվելու են։

Որևէ փաստաթուղթ այդպես էլ չստորագրվեց, հայտարարվեց միայն, որ հաջորդ շաբաթ փոխվարչապետների մասնակցությամբ սահմանագծման և սահմանազատման նիստ է գումարվելու։

Արմինե Մխիթարյան