Հայաստանի դիվանագիտական կորպուսում նոր ցնցումներ են սպասվում
ՎԵՐԼՈՒԾՈՒԹՅՈՒՆՆԵՐ
44-օրյա պատերազմից հետո դեսպանատները գրեթե մատնվել են պարապուրդի, իսկ արտգործնախարար Արարատ Միրզոյանը հազվադեպ է շփվում տարբեր երկրներում Հայաստանի դիվանագիտական ներկայացուցիչների հետ։ Հատուկենտ դեսպաններ են, որոնք կարողանում են իրենց աշխատանքը իրականացնել բարեխղճորեն և պաշտպանել Հայաստանի հանրապետության շահերը, իսկ մնացած դեպքերում դեսպանների մեծամասնությունը լիովին մատնված է պարապուրդի և գրեթե ոչինչ չեն ձեռնարկում թուրք-ադրբեջանական ակտիվությունը իրենց հյուրընկալած երկրներում կանխելու ուղղությամբ։
Հատկապես իրավիճակը վատթար է այն երկրներում, որտեղ Փաշինյանը նշանակել է իր քաղաքական թիմի անդամ հանդիսացող և դիվանագիտական աշխատանքների փորձ չունեցող ներկայացուցիչներին։ Թեպետ գործող իշխանությունները փորձում են համոզել, որ կադրային շատ դիվանագետների չեն վստահում, ուստի և նշանակումներ իրականացրել են իրենց քաղաքական թիմի անդամներից, ակնհայտ է, որ այդ նշանակումների մի զգալի մասը արդեն իսկ ձախողվել է։
Առաջիկայում իր պաշտոնին հրաժեշտ է տալու մերձբալթյան երեք երկրներում դեսպան նշանակված Հովհաննես Իգիթյանը։ Վերջինս նախորդ դեսպանների բավականին բուռն և ակտիվ գործունեության, այդ թվում ցեղասպանության ճանաչման ֆոնին, ընդհանրապես ոչնչով չի զբաղվում և իր նստավայրից հազվադեպ է այցելում մյուս երկրներ, զբաղված է բացառապես հայ համայնքի ներսում ինտրիգներ հրահրելով և դժգոհությունն այն աստիճանի է աճել փաշինյանական իշխանության մեջ, որ որոշել են Իգիթյանին հետ կանչել։ Ավելին Իգիթյանը պահանջել է դրա դիմաց փոխարտգործնախարարի պաշտոնը՝ հույս ունենալով իր «պատվավոր» պարապուրդը շարունակել նաև Երևանում։
Ի դեպ մեր աղբյուրի փոխանցմամբ՝ հենց Արարատ Միրզոյանը կտրականապես հրաժարվել է Իգիթյանին փոխարտգործնախարար նշանակել և վերջինս կարող է ընդհանրապես դուրս մնալ դիվանագիտական կորպուսից։ Իգիթյանին որևէ այլ երկրում չեն ցանկանում նշանակել։ Փաշինյանը նաև լուրջ դժգոհություններ ունի Գերմանիայում և Իսպանիայում գործող դեսպաններից՝ «Քաղաքացիական պայմանագիր» կուսակցությունից նախկին պատգամավորներ Վիկտոր Ենգիբարյանից և Սոս Ավետիսյանից։ Եթե Ավետիսյանի դեպքում լուրջ պատիժներ չեն կիրառվի, քանի որ նա անվտանգության խորհրդի քարտուղար Արմեն Գրիգորյանի կնոջ եղբայրն է, ապա Վիկտոր Ենգիբարյանին ևս սպառնում է պաշտոնանկության ուրվականը։ Իր քաղաքական թիմից կատարված նշանակումներից Փաշինյանը գոհ է թերևս միայն Ուկրաինայում դեսպան Վլադիմիր Կարապետյանից և ԱՄՆ-ում դեսպան Լիլիթ Մակունցից։
Նորայր Բարսեղյան
