«Վիագրան» օգտակար է դիաբետով և սրտային խնդիրներով մարդկանց համար
ԱՄԵՆԱԸՆԹԵՐՑՎԱԾ
Պարզվել է, որ տղամարդկային անկարողության դեմ դեղամիջոցները, այդ թվում ` «Վիագրան» ի վիճակի են նվազեցնել սրտային հիվանդությունների ռիսկը: Daily Express պարբերականը գրում է, որ համապատասխան հետազոտություն են կատարել Մանչեստրի համալսարանի կարդիովիրաբուժության կենտրոնի մասնագետները (Մեծ Բրիտանիա):
Պարզվել է, որ էրեկտիլ դիսֆունկցիայի դեմ դեղահաբերի ընդունումը թույլ է տալիս նվազեցնել առիթմիան (սրտխփոցի ռիթմի խանգարումը), որը հաճախ սրտային անբավարարությամբ հիվանդների մահացության պատճառ է դառնում:
Բացի այդ, գիտնականները հետեւել են վեց դիաբետիկից կազմված խմբի, որոնց «Վիագրայի» տեսակի դեղամիջոցներ էին նշանակել: Վիճակագրության համաձայն, դիաբետով տառապողներն առավել ենթակա են սրտանոթային հիվանդությունների, այդ թվում` սրտի կաթվածների: Սակայն դիտարկման ենթարկվող հիվանդների մոտ ճիշտ հակառակ իրավիճակն էր ձեւավորվում:
«Սրտային անբավարարությունը ավերիչ վիճակ է, որի դեպքում մեր սիրտն ամբողջ մարմնով արյունն այնպես չի շրջանառում, ինչպես նախկինում (...) Ներկայումս այս հիվանդությամբ հիվանդների հեռանկարները բավականին մռայլ են` ավելի վատ, քան քաղցկեղի որոշ տեսակների դեպքում: Մեր հետազոտությունները ցույց են տվել, որ անկարողության բուժման համար սովորաբար օգտագործվող դեղամիջոցներն իրականում շատ արտահայտված ազդեցություն ունեն, որը դանդաղեցնում է սրտային անբավարարության զարգացումը: Նրանք նաեւ նվազեցնում են առիթմիայի հավանականությունը, որը մահացու ելքի է հանգեցնում», — պատմել է պրոֆեսոր Էնդրյու Թրաֆֆորդը:
Ներկայումս գիտնականները մտադիր են կլինիկական հետազոտություններ կատարել, որոնք կպարզեն, թե «Վիագրայի» նման դեղամիջոցներն ինչպես են ազդում սրտի հիվանդությունների զարգացման վրա:
