Փաշինյանի և նրա ընտանիքի ցինիզմն այլևս անտանելի է դառնում
ՎԵՐԼՈՒԾՈՒԹՅՈՒՆՆԵՐ
Փաշինյանի և նրա ընտանիքի ցինիզմն այլևս անտանելի է դառնում։ Մինչ գործող իշխանությունները և նրանց սպասարկուները փորձում են հանրությանը համոզել, թե զոհված զինծառայողների ծնողները առևանգել են վարչապետի սիրասուն և խղճուկ զավակին, ինքը Աշոտ Փաշինյանը իր ցինիկ և լկտի պահվածքով ապացուցում է, որ իրականում «հատուկ» գործողություն է իրականացվել վարչակազմի կողմից՝ ընդդեմ «Որդիների կանչ» կազմակերպության։
Ձերբակալված Գայանե Հակոբյանի փաստաբան Վահան Հովհաննիսյանը երեկ հայտարարել է, թե առերեսման ժամանակ Աշոտ Փաշինյանը հանգամանալից պատրաստված է ներկայացել հանդիպմանը։ Անգամ կանխատեսել և հաշվառել է զոհված զինծառայողի մոր պաշտպանի կողմից տրվող բոլոր հարցերը։ «Օրինակ, երբ պաշտպանական կողմը հարց ուղղեց, թե մինչև Ծերեթելիի «Երևան Սիթի» հասնելը չկային արդյոք այլ լուսացույցներ, պարոն Փաշինյանը հայտարարեց, թե ես կարող եմ պատասխանել նաև հաջորդ հարցին, որ թեպետ լուսացույցներ եղել են, բայց կանաչ է եղել, հետևաբար չէր կարող իջնել։ Այ այդպես պատրաստված էր եկել առերեսման»,- ասել է պաշտպանը։
Նա նաև ընդգծել է, թե Աշոտ Փաշինյանը զոհված զինծառայողի մոր հետ առերեսման էր եկել Նիկոլ Փաշինյանի դիմանկարով վերնաշապիկով՝ վրան գրված Նիկոլ 100%։ Այս կերպ ապացուցվեց, որ լիովին անտեղի և անհեթեթ են այն պնդումները, թե Փաշինյանի որդին խնդիրներ ունի իր ընտանիքի հետ և չի կիսում իր ընտանիքի դավաճանական հայացքները։
Ըստ էության, ի դեմս փաշինյանների ընտանիքի, գործ ունենք չափազանց ցինիկ և լկտի մի «խմբավորման» հետ, որի ամբողջ նպատակը իշխանությունը սեփական ձեռքերում պահելն է, և Նիկոլ Փաշինյանը չի խորշում սեփական զավակներին իր նեղ անձնական շահերի համար օգտագործելուց։
Ի դեպ, Գայանե Հակոբյանի կալանքի հարցով որոշումը դատարանը կայացնելու է այսօր։ Թեև շատ ավելի տրամաբանական կլինի, որ հենց երեկ կայացներ։ Փորձում են այս կերպ ևս մեկ օր ձգձգելով՝ հունից հանել թե՛ զոհված զինծառայողի մորը, թե՛ «Որդիների կանչ» կազմակերպությանը, նրանց մղել չմտածված քայլերի, այդկերպ հնարավորություն ունենալով ձերբակալել շատերին և կոտրել կազմակերպության մեջքը։
Նունե Պապյան
