Արդյո՞ք տղամարդկային է Սիմոնյանի քայլը

ԱԺ նախագահ Ալեն Սիմոնյանը ներողություն է խնդրել, իր իսկ գնահատմամբ ՀՀ բոլոր քաղաքացիներից: Իրականում հասկացել է, որ փողոցում իրեն որպես պաշտոնյա, մեղմ ասած՝ վատ է պահել կամ ստիպել են, որ հասկանա, քանի որ դեպքից հետո արված գրառմամբ չէր փոշմանել, դեռ նույնիսկ ակնարկում էր, որ սրանից հետո էլ այդպես է լինելու: Իսկ այն, որ խոսում է թե տղամարդկային արժանապատվությունից ելնելով է նյարդերը տեղի տվել՝ անհասկանալի է:

Քաղաքացին ասում է, որ թիկնապահները բռնել են իր ձեռքերը և Ալեն Սիմոնյանը թքել է իր վրա: Նկատենք, որ դեպքին այս օրերին մի քանի անգամ անդրադարձավ Ալեն Սիմոնյանը, սակայն մանրամասներից չխոսեց և քաղաքացու ասածը չհերքեց: Արդյո՞ք տղամարդկային է Սիմոնյանի քայլը:

Եթե դա տեղի տված նյարդերի և արժանապատվության բարձր զգացման արդյունք է, ապա առնվազն պետք է շրջվեր և անձանմբ հարվածեր կամ նմանատիպ վիրավորանք հասցներ քաղաքացուն: Իհարկե, Սիմոնյանի արարքի ժառանգական բնույթը հաշվի առնելով, գուցե իր համար արժանապատիվ պատասխանը դա էր: Սա մի կողմ թողնելով, պետք է արձանագրենք, որ ԱԺ նախագահը չի փոշմանել, այլ ուղղակի թիմի ներսում ասել են, որ սա արդեն մի քիչ չափից դուրս էր և ներողության անհրաժեշտություն կա:

Միտքը սկում է հետևյալ շարադրությամբ. «Նախ շնորհակալություն եմ հայտնում այն բոլոր մարդկանց, որոնք այս օրերին ինձ սատար են կանգնել….»:

Պարո՛ն Սիմոնյան, եթե Դուք, իսկապես, հասկանում եք Ձեր արաքի սխալ լինելը, ապա առնվազն սխալ արարքին սխալ սատարելը ևս սխալ է և դրա համար շնորհակալություն հայտնելը հաջորդ սխալն է:

«Նաև սա պատշաճ առիթ է քաղաքական ընդդիմության համար, որ վերջինս վերանայի իր հռետորաբանությունը, անձնական վիրավորանքներ հասցնելու իր մարտավարությունը և վերադառնա քաղաքակիրթ բանավեճի դաշտ»:  Սա ևս ներողության տեքստից է, որտեղ ԱԺ նախագահն ընդդիմության կոչ է անում վերանայել իր քաղաքականությունը՝ հստակ հասկացնելով, որ ինքը դա արել է, ոչ թե հունից դուրս գալով, այլ մտածված, որ էլ ոչ մեկն իրենց թիմին քննադատել անգամ չփոձի:

Էական է նաև այն, որ Ալեն Սիմոնյանը ներողություն է խնդրում ՀՀ բոլոր քաղաքացիներից, բայց ոչ հենց այն մեկից, որ առանց թիկնազոր ունենալու է համարձակվել, քննադատել պաշտոնյային, ում թիկնազոր ունենալու համար հարկերի տեսքով վճարում է հենց այդ նույն քաղաքացին: Փոշմանող մարդը, անկախ տեքստի բովանդակությունից հենց այդ քաղաքացուց ներողություն պիտի խնդրեր, կամ էլ ընդհանրական է ասել, որ Աշոտ Փաշինյանը ևս ներառված լինի, քանի որ նա հայտարարեց, թե հարձակում է եղել վարչապետի որդու վրա, որն էլ Աշոտ Փաշինյանը հերքեց: Գուցե նաև նրանից էր հարկավոր ներողություն խնդրել՝ իր մասին ստահոդ տեղեկություններ գրելու համար:

Աննա Ավետիսյան