Սմարթֆոնների, ցույցերի արգելք, հետո ի՞նչը կարգելվի. Հայաստանում ռազմական հեղաշրջման հոտ է գալիս
ՎԵՐԼՈՒԾՈՒԹՅՈՒՆՆԵՐ
Tsargrad.tv–ն գրում է, որ Հայաստանի խորհրդարանը քննարկում է ռազմական օրենքներում փոփոխություններ կատարելու նախաձեռնությունը։ Սոցցանցերի օգտատերերը դա ընկալել են որպես որոշակի քաղաքական ազդանշան:
Մարտի 3-ին ՀՀ պաշտպանության փոխնախարար Արման Սարգսյանը ներկայացրել է Վարչական իրավախախտումների վերաբերյալ օրենսգրքում և «Զինվորական ծառայության և զինծառայողի կարգավիճակի մասին» օրենքում փոփոխությունների փաթեթ։
Փոփոխությունները ենթադրում են սմարթֆոնների օգտագործման և հանրահավաքներին մասնակցության արգելքի սահմանում։ Այդ սահմանափակումը կտարածվի բացառապես զինվորական ծառայություն իրականացնող անձանց վրա։
«Զինվորական անձնակազմին արգելվում է անձամբ կամ կոլեկտիվ հրապարակային կոչեր կամ հայտարարություններ անել ծառայողական կամ քաղաքական հարցերի վերաբերյալ»,- հավելել է Սարգսյանը։
Երրորդ նորամուծությունը ենթադրում է, որ զինվորականները, ովքեր չունեն ղեկավարության գրավոր թույլտվություն, իրավունք չունեն հրապարակել իրենց գործունեության մասին տեղեկատվություն և քննարկել այն կողմնակի անձանց հետ։
Բացի այդ, շեմային տարիքը լրացած հայ պայմանագրային զինծառայողները կկարողանան ծառայել ևս 10 տարի։ Պայմանագրային ծառայության կարող են անցնել նաև պաշտոնաթող ավագ սպաները։
Վարչական իրավախախտումների վերաբերյալ օրենսգրքում կատարված փոփոխությունները նախատեսում են նաև տուգանքի ներդրում: Այն գանձվելու է այն անձանցից, ովքեր իրավունք չունեին համազգեստ կրելու, բայց դեռ կրում են այն։
Սոցցանցերի հայալեզու օգտատերերը կարծում են, որ վարչապետ Նիկոլ Փաշինյանը այս կերպ պատրաստվում է հավանական հեղաշրջմանը։ Հայաստանի կառավարության ղեկավարը, ըստ նրանց, մտավախություն ունի, որ վաղ թե ուշ զինվորականները ոտքի կելնեն իր դեմ, քանի որ հասկանում են, որ Փաշինյանը ներգրավված է անվտանգության իրավիճակի վատթարացման մեջ։
«Փաշինյանը հանձնեց Ղարաբաղը, հիմա էլ հանձնում է Հայաստանը, ինչ որ բան պետք է անել, զինվորականների համբերությունն անսահման չէ»,- օրինակ սոցցանցում գրում է Ա. Ավետիսյան օգտատերը։
Նյութը հրապարակման պատրաստեց Կամո Խաչիկյանը
