Ալիևի հետ համատեղ վարկաբեկել Հայաստանի քաղաքացիներին և բանակը. Աննա Հակոբյանի հայտարարությունը

Խայտառակ այն հայտարարությունը, որ վարչապետի տիկին Աննա Հակոբյանը արել է Տավուշի մարզի Աճարկուտ գյուղում դեռևս երկար վերլուծելու առիթ է տալիս։

Մասնակցելով 44-օրյա պատերազմում անմահացած Դավիթ Շահնազարյանի 23-րդ տարեդարձի միջոցառմանը՝ վարչապետի տիկինը հայտարարել է, թե 44-օրյա պատերազմի ընթացքում ունեցել ենք 11 հազար դասալիք՝ զինվորական կամավոր, սպա։ Կորցրել ենք Դավիթին և 4 հազար այլ տղաների, քանի որ շատերը չեն գնացել, երբ որ պատերազմի ժամանակ գերագույն գլխավոր հրամանատարը կոչ է արել կամավորագրվել հայրենիքի պաշտպանությանը, կոչին չէին հետևում։

«Երբ ես՝ որպես կին, որոշեցի ջոկատ կազմել ու ցույց տալ, որ կարիք այնքան կա, որ կանայք են մասնակցում ու տղամարդիկ տեսնելով կգնային իրենց գործն անելու, էլի լավ արձագանք չեղավ»,- հայտարարել է Աննա Հակոբյանը։ Մի կողմ թողնենք այն հարցը, որ դասալիքների ամենամեծ թիվը կենտրոնացված է հենց նրա ամուսնու ղեկավարած իշխանության կազմում։

Թե՛ Փաշինյանը և թե՛ «Քաղպայմանագրի» ներկայացուցիչների գերակշիռ մեծամասնությունը ընդհանրապես չեն ծառայել, իսկ 44-օրյա պատերազմը օգտագործել են բացառապես սելֆիների համար։ Այն, ինչ հայտարարում է Աննա Հակոբյանը, առաջին հերթին հենց ադրբեջանական նարատիվների ուղիղ տարածում է հայ հանրության մեջ և հայկական բանակի վարքաբեկում։

Ի դեպ, 11 հազար թիվը Աննա Հակոբյանը բոլորովին էլ պատահաբար չի հնչեցրել։ Դեռևս մարտի 18-ին այդ մասին հայտարարում էր Ադրբեջանի նախագահ Իլհամ Ալիևը՝ լիովին անհիմն, հայկական բանակին մեղադրելով հենց 11 հազար դասալիք ունենալու մեջ։ Ուստի և գործող իշխանությունները, երբ ընդդիմությանը կամ ընդդիմադիր տրամադրված հանրային խմբերին են մեղադրում ադրբեջանական նարատիվներ առաջ մղելու մեջ, պետք է այժմ մեկ հարցին պատասխանեն, թե ինչո՞ւ է վարչապետի տիկինը անձամբ իր բերանով, այն էլ զոհված զինծառայողին նվիրված միջոցառման ժամանակ առաջ տանում այսպիսի անհեթեթ, վտանգավոր և լկտի սուտ։

Իսկ նման հայտարարություններն առաջին հերթին, հատկապես ստեղծված ծանր պայմաններում, երբ Հայկական բանակը դեռևս ուշքի չի եկել պատերազմում կրած պարտությունից, փաշինյանական իշխանությունն էլ ոչինչ չի անում այդ ուղղությամբ, սպառնալիք է կախված ոչ միայն Արցախի այլ նաև Սյունիքի ու ողջ Հայաստանի Հանրապետության գլխին, շարունակում նման վտանգավոր թեզերով վարքաբեկել Հայաստանի զինված ուժերին։

Ըստ էության, վաղուց կարելի է այլևս պնդել, որ ի դեմս փաշինյանական իշխանության, գործ ունենք շարքային դավաճանների և թուրք-ադրբեջանական շարասյան հետ։

Լիաննա Զոհրաբյան