Երևանի ընտրություններին մեծ անակնկալներ կլինեն
ՎԵՐԼՈՒԾՈՒԹՅՈՒՆՆԵՐ
Թեև իշխանությունը որոշել է Երևանի քաղաքապետի ընտրությունները կայանալու են ոչ թե արտահերթ, այլ սեպտեմբերին, արդեն իսկ ակնհայտ է դառնում, որ մի ամբողջ շարք քաղաքական ուժեր առաջադրելու են իրենց ընտրական ցուցակները ընտրությունների համար։
Մեր աղբյուրների փոխանցմամբ՝ ՀՅԴ-ն վերջնականապես որոշել, որ անպայման սեփական ընտրացուցակով է մասնակցելու ընտրություններին, ընդ որում Դաշնակցությունը անունը կդնի քաղաքական ընտրություն՝ հայտարարելով, թե լավ շանս է իշխանափոխությունը իրականացնելու համար։
Մեծ հավանականությամբ ընտրացուցակը կգլխավորի ՀՅԴ գերագույն մարմնի ներկայացուցիչ Իշխան Սաղաթելյանը։ Այս պահի դրությամբ հստակ է, որ իր թեկնածությունը կառաջադրի նաև «Հայրենիք» կուսակցության նախագահ Արթուր Վանեցյանը, ով ևս առանձին է մասնակցելու ընտրություններին։ Թերևս «Հայաստան» դաշինքի խորքային պառակտման արդյունքում հնարավոր է, որ այդ դաշինքից ևս մեկ այլ թեկնածու առաջադրվի։ Ինչպես արդեն նշել ենք՝ Անդրանիկ Թևանյանը ցանկանում է առանձին ցուցակով մասնակցել, հայտնի չէ արդյոք նա կմասնակցի հենց «Հայաստան» դաշինքի իր գործընկերների աջակցությամբ, թե որևէ այլ քաղաքական ուժի ընտրացուցակով, սակայն մեծ հավանականությամբ առաջադրվելու է։
Խորհրդարանական ընդդիմությունում այսպիսով առնվազն 3-4 ցուցակ կներկայացնի ընտրությունների համար։ Չի բացառվում, որ նույնիսկ ՀՀԿ-ն սեփական ընտրացուցակով մասնակցի։ Հաշվի առնելով, որ արտախորհրդարանական ընդդիմությունն էլ հանդես է գալու «Ապրելու երկիր» կուսակցության ձևաչափով, որը բավականին թափ է հավաքել և լուրջ մրցակցություն կարող է ներկայացնել թե՛գործող իշխանություններին և թե՛ ընդդիմությանը, կարելի է ասել, որ ձայները զգալի կբաժանվեն գործող իշխանությունների և ընդդիմության միջև։ Ի դեպ ձեռքերը ծալած չի ստել նաև իշխանությունը։
Նիկոլ Փաշինյանն էլ սեփական ընդդիմությանն է առաջադրելու՝ տիտղոսային ընդդիմության ձայները փոշիացնելու նպատակով։ Առնվազն երկու-երեք դաշինքներով, կամ կուսակցություններով իշխանամերձ քաղաքական ուժերը մասնակցելու են ընտրություններին։
Միգուցե քարոզարշավի ժամանակ ավելի կոշտ հակաիշխանական կարգախոսներ հնչեցնեն՝ այդ կերպ փորձելով Նիկոլ Փաշինայնին արմատական տրամադրված ընտրազանգվածին թեքել իրենց կողմը։ Ցավոք առայժմ չի նշմարվում մեկ միասնական թեկնածուով իշխանությունը գրոհելու հնարավորությունը։
Սարգիս Ավագյան
