Քաղաքական ուժերի «ֆալս-ստարտը» կարող է հետևանքներ ունենալ

Քաղաքական ուժերը քաղաքապետ Հրաչյա Սարգսյանի հրաժարականից հետո արդեն աստիճանաբար հայտարարում են հայտեր ներկայացնելու իրենց մտադրությունների մասին, թերևս կարելի է դա դասել «ֆալս-ստարտի» շարքին։

Մեր տեղեկություններով՝ փաշինյանական իշխանությունը բնավ էլ մտադիր չէ սեպտեմբերից շուտ անցկացնել Երևանի ավագանու ընտրությունները։ Իշխանությունը պարզապես ազատվեց Հրաչյա Սարգսյանի ներկայությունից՝ տեղեկություններ ունենալով, որ վերջինս մի շարք դեպքերում տարբեր սեպարատ բանակցություններ ու պայմանավորվածություններ է ունեցել այլ ընդդիմադիր քաղաքական ուժերի հետ՝ չկարողանալով համակերպվել իրեն՝ քաղաքապետի պաշտոնում չառաջադրվելու վերաբերյալ։

Ի դեպ, մեր աղբյուրի փոխանցմամբ՝ Հրաչյա Սարգսյանը դեռևս շաբաթներ առաջ մի հարցման արդյունքներ է տարել Նիկոլ Փաշինյանի մոտ, փորձել նրան համոզել, թե իր վարկանիշն ավելի բարձր է, քան Տիգրան Ավինյանի վարկանիշը և առաջարկել է իրեն թողնել Երևանի քաղաքապետի պաշտոնում։

Ընդսմին, իշխանությունները հրաշալի իմանալով, թե ինչ մեթոդներով ու եղանակներով է ստացել այդ «բարձր» վարկանիշը, նրան ուղարկել են իր աշխատավայր՝ ոչինչ չստանալով, սակայն արդեն անցած շաբաթ պարզ ակնարկել են, որ ցանկանում են ազատվել նրա ներկայությունից, իսկ Սարգսյանը կշարունակի մնալ իշխող թիմի կազմում և օգտվել իշխանության բարիքներից, միայն մի պայմանով, որ ձայնը կտրի և համաձայնվի գնալ աշխատել Կենտրոնական բանկի խորհրդում։

Մյուս կողմից Տիգրան Ավինյանը ևս չունի բավարար վարկանիշ հենց հիմա ընտրություններն անցկացնելու համար, թեև իշխանության անցկացրած հարցման արդյունքներով Ավինյանի վարկանիշն ավելին է, քան ընդդիմադիր կուսակցություներն առանձին վերցրած, սակայն ընդդիմությունը նույնիսկ մանր խմբերով ընտրություններին մասնակցելու դեպքում լուրջ ռեսուրս ունի՝ գերազանցելու Ավինյանին, և այդ դեպքում՝ քաղաքապետ դառնալու Տիգրան Ավինյանի ծրագրերը կարող են լիովին հօդս ցնդել, ուստի և պատրաստվում են ընտրություններն անց կացնել սեպտեմբերին՝ հույս ունենալով, թե մինչ այդ Տիգրան Ավինյանի ակտիվությունը հնարավորություն կտա փոքր-ինչ բարձրացնել իշխող ուժի վարկանիշը։

Նոնա Սիրադեղյան