Երեք ամիս անց «Քաղպայմանագիրը» ՄԻՊ թեկնածու է առաջադրել. Չեղածի հաշիվ

Երեք ամիս տվայտվելուց և տառապելուց հետո՝«Քաղաքացիական պայմանագիր» կուսակցությունը վերջապես երեկ որոշում է կայացրել մարդու իրավունքների պաշտպանի սեփական թեկնածու ներկայացնել, թերևս սա այն դեպքն է, երբ ավելի լավ է ընդհանրապես որևէ մեկին չներկայացնեին։

Ի վերջո, պարզելով, որ իրեն հարգող և մասնագիտական ընդունակություններ ունեցող որևէ իրավաբան չի ցանկանում Նիկոլ Փաշինյանի մոտ օմբուդսմեն աշխատել, «Քաղաքացիական պայմանագիրը» այդ պաշտոնի համար առաջարկել է գլխավոր դատախազի տեղակալ Անահիտ Մանասյանի թեկնածությունը։

Մանասյանը, նշենք, գլխավոր դատախազի տեղակալ էր նշանակվել միայն մեկ պատճառով, որ գլխավոր դատախազ, Նիկոլ Փաշինյանի նախկին օգնական Աննա Վարդապետյանի մտերիմ ընկերուհին է, իսկ Վարդապետյանն էլ չի կարողանում աշախատել այլ պրոֆեսիոնալների հետ և սեփական ընկերուհիներին է տեղավորում դատախազությունում։

Պարզվեց՝ մեկ այլ ընկերուհու էլ գործուղում է Մարդու իրավունքների պաշտպանի գրասենյակ։ Մի կողմ թողնենք այն հանգամանքը, որ այս նշանակման դեպքում ՄԻՊ գրասենյակն այլևս չի կարող անաչառ լինել դատախազության որևէ ապօրինությունը քննելիս։ Հիշեցնենք՝ նախկինում նշել էինք, որ օմբուդսմենի թեկնածության համար Նիկոլ Փաշինյանը ընդամենը մեկ պահանջ ունի թեկնածուից. ամեն գնով ենթարկվել իրեն։

Փաշինյանի «իրավունքների պաշտպանը» չպետք է լինի բարձր պրոֆեսիոնալ և մասնագիտական հանրույթում հեղինակություն վայելող անձ, փոխարենը պետք է կատարի իշխանության քմահաճույքները և ամեն գնով ապահովի Նիկոլ Փաշինյանի իշխանության վերարտադրությունը, տարատեսակ զեկույցներում էլ սվաղի բոլոր անհարթ կետերը։

Ըստ երևույթին, «Քաղաքացիական պայմանագիրը», ի դեմս Մանասյանի, կարողացել է գտնել այդպիսի մի թեկնածու։ Ընդդիմությունն առայժմ որևէ մեկին չի առաջադրել օմբուդսմենի պաշտոնի համար, թեև տեղեկություններ են շրջանառվում, որ դա կարող է լինել ՍԴ աշխատակազմի ղեկավար, Լեհաստանում նախկին դեսպան Էդգար Ղազարյանը։ Վերջինիս էքսցենտրիկ վարքն ու տարբեր իրավիճակներում անհեթեթ դրության մեջ հայտնվելու հանգամանքն էլ վկայում են, որ առաջադրվելու դեպքում նա էլ վարկաբեկելու է իրեն առաջադրող քաղաքական ուժերին։

Ամեն դեպքում փաստենք, որ փաշինյանական իշխանության օրոք բավական արդյունավետ աշխատած Արման Թաթոյանից հետո, Մարդու իրավունքների պաշտպանի պաշտոնը դառնում է զուտ ձևականություն և այլևս որևէ լուրջ լծակ ու ազդեցություն չի ունենալու։

Մարտին Հայրապետյան