Տարօրինակ է. ինչո՞ւ ԱՄՆ պետքարտուղարը Փաշինյանի հետ զրույց ունենալուց առաջ չի խոսել նաև Ալիևի հետ

ԱՄՆ պետքարտուղար Էնթոնի Բլինքենը հեռախոսազրույց է ունեցել Հայաստանի վարչապետ Նիկոլ Փաշինյանի հետ, որում առաջարկել է ԱՄՆ-ի շարունակական աջակցությունը՝ նպաստելու Ադրբեջանի հետ երկկողմ խաղաղ բանակցություններին։ Այս մասին ասվում է ԱՄՆ Պետդեպարտամենտի կայքում տեղադրված հաղորդագրության մեջ։

Պետքարտուղար Բլինքենը շնորհակալություն է հայտնել վարչապետ Փաշինյանին՝ խաղաղությանը նվիրված լինելու համար և խրախուսել կոնկրետ դեպի առաջ քայլերը՝ չլուծված խնդիրների լուծումները գտնելու ուղղությամբ, ընդգծել, որ ռազմական լուծում չկա:

Ավելի վաղ ՀՀ կառավարությունից հայտնել էին, որ Փաշինյանը և Բլինքենը քննարկել են Ադրբեջանի կողմից Լաչինի միջանցքի ապօրինի շրջափակման հետևանքով ստեղծված հումանիտար ճգնաժամին վերաբերող հարցեր:

Իհարկե հայտարարությունները որոշակի իմաստով իրարից տարբերվում են՝ հումանիտար ճգնաժամը և հարցերի լուծման խաղաղության այլընրանք չունենալն էականորեն տարբեր են: Բլինքենն ասում է, որ խաղաղությունն այլընտրանք չունի, տարօրինակ է, որ դրա համար հարթակ տրամադրելու առաջարկությունն արվում է մի երկրի, որն ամեն օր հայտարարում է թե պատրաստ է ստորգրել և՛ ԵՄ-ի, և՛ ՌԴ-ի կողմից ներկայացված առաջարկների տակ, միայն թե դրան չի համաձայնում Ադրբեջանի նախագահը: 

Տարօրինակ է, որ ԱՄՆ պետքարտուղարը Փաշինյանի հետ զրույց ունենալուց առաջ կամ հետո չի խոսել նաև Ալիևի հետ, չի ասել, որ պատրաստ են հարթակ տրամադրել, չի բացատրել, որ Լաչինի միջանցքը փակ պահելով խաղաղության օրակարգին հակասում են և այլն: Գուցե, Ալիևը սրա մասին գիտի և այդ ամենն իրեն ասելու համար հեռախոսազրույց ունենալու կարիք չկա, իսկ ՀՀ վարչապետի փոփոխական լինելը հաշվի առնելով, հավանաբար ուզում էր հասկանալ, թե աշխարահքաղաքական բևեռի նոր ուղղվածություն վերցնելու մտադրություն կա: Հեռախոսազրույցը կարող էր հաղորդագրություն լինել նաև Ռուսաստանին, որ Պրահայի, ԵՄ ներկայացուցչի հետ հանդիպումներն են որոշիչ լինելու:

Աննա Ավետիսյան