Երևանը կրկին քաղաքապետ չունի. Ինչի՞ն է պատրաստվում «Քաղպայմանագիրը»

Երևանի քաղաքապետ Հրաչյա Սարգսյանը հրաժարական տվեց, իսկ նրա լացակումաց հրաժեշտը պաշտոնին կարող է «տարվա դրամատիկ դեր» անվանակարգում առաջին տեղը շահել։ Օրեր շարունակ լուրեր էին շրջանառվում, որ Սարգսյանը, ի վերջո, հեռանալու է քաղաքապետի պաշտոնից։

Նույնիսկ շրջանառվում էր, որ «Քաղաքացիական պայմանագիրը» պատրաստվում է արտահերթ ընտրություններ կազմակերպել՝ ընդդիմությանը թույլ չտալով մոբիլիզացվել Երևանի ավագանու ընտրությունների համար։ Այժմ, թերևս, ակնհայտ է, որ «Քաղաքացիական պայմանագիրը» մտադիր չէ արտահերթ անել, քաղաքապետի աթոռը ժամանակավորապես կտաքացնի առաջին փոխքաղաքապետ Լևոն Հովհաննիսյանը, իսկ իշխանության թեկնածուն առանց հրաչսարգսյանական խոչընդոտների կշարունակի իր քարոզարշավը։

Հրաչյա Սարգսյանի հրաժարականի լուրը հաստատվել էր առավոտյան, իսկ արդեն երեկոյան այլևս նախկին քաղաքապետը գործակարգավարական արտահերթ նիստ էր գումարել՝ անձամբ Երևանի քաղաքապետարանի աշխատակազմին, վարչական շրջանների ղեկավարներին և հանրությանը ուղիղ եթերում «ավետելու» իր պաշտոնանկության մասին։ Հրաչյա Սարգսյանի ողբերգական տեսքը, խոսքում հնչող ակնհայտ ելևեջները ու նեղացածությունը փաստում էին՝ նրան հարկադրել են դիմում գրել։

Քաղաքապետը, իհարկե, կարող էր արժանապատվություն ունենալ և, երբ իրեն ցույց են տալիս դռան տեղը, ֆեյսբուքյան գրառմամբ կամ տեսաուղերձով հայտներ այդ մասին։ Փոխարենը, նրան նստացրել և գրեթե հարյուր մարդու ներկայությամբ նվաստացնում էին, իսկ փոխքաղաքապետ Տիգրան Ավինյանը ստանձնել էր թղթերով իր ղեկավար համարվող Հրաչյա Սարգսյանի աշխատանքը գնահատելու «առաքելությունը»։

«Դուք հիշվող քաղաքապետ եք լինելու»,- ծաղրանքով նետել էր Ավինյանը Հրաչյա Սարգսյանին։ Թե ինչո՞ւ էր հեռացող Հրաչյա Սարգսյանը ստիպված կրել այդ հրապարակային նվաստացումը, մեր ընթերցողներին կարող է պարզ չլինել։ Քաղաքապետարանի մեր աղբյուրների փոխանցմամբ, նրան բռնացրել էին իշխող ուժի թեկնածուի դեմ աշխատելու մեջ, հարկադրել հեռանալ պաշտոնից, փոխարենը խոստացել են որպես «թուլափայ» ԿԲ խորհրդի անդամ նշանակել, թեպետ կարող էին և մի քրեական գործ էլ Հրաչյա Սարգսյանի դեմ հարուցել։

Իսկ իշխանությունն առայժմ չի շտապում, Ավինյանը, ըստ ներքին հարցումների, բավարար վարկանիշ չունի հենց հիմա հաղթանակ տանելու համար, ուստի ընտրությունները կկայանան սեպտեմբերին։

Լուսինե Վարդանյան