ՌԴ-ն հստակ ընդգծում է, որ նոր սպասվող պատերազմում ինքը դերակատարում չի ունենալու
ՎԵՐԼՈՒԾՈՒԹՅՈՒՆՆԵՐ
«Մարտի 16-ին Թյուրքական պետությունների ղեկավարների գագաթնաժողովի ընթացքում Ադրբեջանի նախագահ Իլհամ Ալիևի ելույթը Հայաստանի Հանրապետության նկատմամբ տարածքային պահանջների և հերթական ագրեսիայի նախապատրաստման բացահայտ դրսևորում էր։
Տարածաշրջանի կայունությամբ և խաղաղությամբ հետաքրքրված բոլոր գործընկերներն աներկբայորեն պետք է գնահատական տան Ադրբեջանի նախագահի նմանօրինակ քաղաքականությանը և գործուն քայլեր ձեռնարկեն Ադրբեջանի կողմից միջազգային իրավունքի խախտումները վերացնելու և ուժի կիրառման դրսևորումները բացառելու ուղղությամբ»։ Այս մասին ասվում է ՀՀ ԱԳ նախարարության պաշտոնական հողորդագրության մեջ:
Կառավարության նիստում Նիկոլ Փաշինյանը ևս հայտնեց, որ Ադրբեջանը պատրաստվում է արցախահայության ցեղասպանությանը և կոչ էր անում դիմել ՄԱԿ-ին: Նոր սպասվող ռազմական գործողության մասին Փաշինյանը խոսել էր օրերս տեղի ունեցած իր ասուլիսում ևս:
Ստացվում է, որ խաղաղության դարաշրջան բացող իշխանությունը փաստացի պատեհ և անպատեհ առիթով հայտարարում է, որ պատերազմ է սպասվում: Ընդ որում, հայտարարություններից բացի այլ նախապատրաստական գործողություններ չի անում՝ զենքեր ձեռք բերել, զորքերը բերել պատրաստվածության ինչ-որ աստիճանի, զորավարժություններ անց կացնել և այլն: Այս ամենին զուգահեռ արտաքին քաղաքական դաշտում դաշնակիցներ ենք կորցնում:
Կառավարության նիստում արդեն երկրորդ անգամ Նիկոլ Փաշինյանն ասաց, որ եթե ՌԴ-ն չի կարողանում, թեկուզ շատ հիմնավոր և օբեկտիվ պատճառներից ելնելով պահպանել Արցախի ժողովրդի իրավունքները, իրականացնել իր խաղաղպահ առաքելությունն, ապա ինքը պետք է դիմի ՄԱԿ-ին և հայտնի, որ չի կարողանում, և այլ առաքելության կարիք կա: Զախարովայի պատասխանը շատ չուշացավ: «Մենք հայկական կողմի հայտարարությունները համարում ենք 2022 թվականի հոկտեմբերին Եվրոպական միության հովանու ներքո Պրահայում կայացած գագաթնաժողովի գծի շարունակություն։ Ուստի մենք հայկական կողմի, Հայաստանի ղեկավարության խղճին ենք թողնում Ղարաբաղի ճակատագրի պատասխանատվությունը երրորդ կողմի վրա դնելը»,- ընդգծել է ՌԴ ԱԳՆ մամուլի քարտուղարը։
Այսինքն՝ ՌԴ-ն հստակ ընդգծում է, որ նոր սպասվող պատերազմում ինքը դերակատարում չի ունենալու և դրա ողջ պատասխանատվությունն ընկնելու է ՀՀ իշխանության վրա: Սա մեսիջ է և՛ Ադրբեջանին, որ իրենք ռազմական գործողություններում մասնակցություն չեն ունենալու, և՛ հայ բնակչությանը, որ դրա պատասխանատվությունը և հետևանքները մնալու է իրենց ընտրած ղեկավարի խղճին:
Օլյա Մանուկյան
